Nam 2026 là nam sơn rờp lam lơh jơnau kờñ gơguh lơh sa 2 nơm khà ai tơngai bơh nam 2026 tus nam 2030 in, ai tơlik jơnau sồr gah Priă jền in ờ mìng pal tă pơgồp jơnau đơs gàr kơ̆ lơh sa dờng, gròi sền bơta roh giă priă, mờ gam pal hòi jà, tam pà mờ ngui geh cồng nha ală bơnah priă jền nàng chồl tơnguh gơguh lơh sa mhar mờ kơnhăp kơ̆. 

Ƀộ Priă jền neh jal mhar lam lơh jat ngan ngồn Jơnau lơh nền tàm pơrjum dờng Đảng dơ̆ XIV, ală jơnau lơh nền tàm pơrjum, jơnau pơndut Đảng Dà lơgar, Ƀộ Chính trị, Mpồl đơng lam Đảng dà lơgar, Quốc hội dê, jơnau sồr lơh Chính phủ, Thủ tướng Chính phủ dê gơ gơs ală broă lơh, broă rơndap lơh lơh broă nàng lam lơh di tŭ, geh cồng nha tàm 6 nhai bồ nam 2026; pơgồp bal nền nòn mờ ală ƀộ, anih lơh broă, càr, ƀòn dờng rơcang lài tă pơgồp jơnau đơs, lam lơh ndrờm bal, ngac ngar, bơceh lơh, ngan ngồn, geh cồng nha, geh bơta tờm, geh tơngume tờm, gàr niam tŭ tơngai hơ pơrgon lơh gơs khà uă ngan broă; di tŭ lơh jat jơnau sồr lơh jat ală jơnau lơh nền tàm pơrjum tam gơl pràn bơh Ƀộ Chính trị dê, bơt bơtàu gùng dà, broă lơh krơi is ai bàr pe càr, ƀòn dờng kuơmàng mờ tơngume adat boh lam ai ală broă lơh tơrlòng lài lơh sa pa in.