Ngai 03/7, Anih duh broă làng bol càr Dăk Lăk bơyai lơh Pơrjum yal ală jơnau lơh nền bơh Củ tịc Anih duh broă làng bol dê bè broă lơh kwang bàng. Mờ ală jơnau lơh nền pa, mpồl lơh broă sră pơ àr gơnoar atbồ ală anih lơh broă sră pơ àr gơnoar atbồ tàm càr Dăk Lăk tơnơ̆ tŭ tơmut bal neh pồ tơl, gàr broă geh lơh niam sùm.

Tàm pơrjum, Anih duh broă làng bol càr Dăk Lăk yal ală jơnau lơh nền dờp, pồ mờ dờp gơnoar broă đơng lam bồ gơ wèt mờ cau lam bồ uă anih lơh broă, mpồl lơh broă kâp sờh tàm càr. Mùl màl: Pồ ồng Trần Văn Tân – Kwang lam bồ Sờh Priă jền càr Phú Yên (yau) at gơnoar broă Kwang lam bồ Sờh Priă jền càr Dăk Lăk. Dờp mờ pồ ồng Cao Đình Huy – Phó Ƀí thư Thàñ ủy, Củ tịc Anih duh broă làng bol ƀòn dờng Tuy Hòa, càr Phú Yên at gơnoar broă Kwang lam bồ Sờh Bơt bơtàu càr Dăk Lăk. Pồ mò Lê Thị Thanh Xuân – Kwang lam bồ Sờh Bơto bơtê mờ Bơsram càr Dăk Lăk (yau) at gơnoar broă Kwang lam bồ Sờh Bơto bơtê mờ Bơsram càr Dăk Lăk. Pồ ồng Nay Phi La – Kwang lam bồ Sờh Lơh sơnơm càr Dăk Lăk (yau) at gơnoar broă Kwang lam bồ Sờh Lơh sơnơm càr Dăk Lăk… Đơs tàm pơrjum, Củ tịc Anih duh broă làng bol càr ồng Tạ Anh Tuấn cih dờp, jờng rơ tŭ tơngai lơh broă, tă pơgồp mờ nùs nhơm geh kơnòl bơh ală kwang bàng geh pồ dê, mờ kung sồr mpồl kwang đơng lam bồ pơn jat tai ngui pràn jak, bồ tơngoh, nùs nhơm mờ tam klac bal nàng bơt bơtàu mpồl lơh broă sră pơ àr gơnoar atbồ lơh broă geh cồng nha, drơng jơnau kờñ tàm tŭ tơngai bơtàu tơnguh pa bơh càr dê.