Tềng hìu niam chài mpồl bơtiàn ƀòn Jarah, sàh Nâm Nung, càr Lâm Đồng, dơ̆ bơsram dròng cing kòn cau Mnông geh gal làng bol tàm ƀòn bal mờ uă sơnam tus bal. Tàm să jan soh ào kòn cau ờs mờng, ală săp tamya niam, ală cau chờ hờp mờ tamya bal mờ să ntas dròng cing ờs mờng “Tet tơ ndơl”. Ồng Y Xuyên bơto: “Añ gàr bơhiàn ờs mờng bơh yau bè cing mồng, tàñ ồi yau. Tàm do kung gam prăp ală phan sa ờs mờng kòn cau Mnông dê bè biăp brê, trŭ poăc, ka mờ plai blơn bơtăng, biăp nse gòl mờ mrĕ hòi… kung gam lơh sùm. Añ pờ 2 ơdŭ, ơdŭ dròng cing mờ ơdŭ lơh gơnơng ờs mờng. Oh kòn tus bal gal ngan, geh uă ngan cau tus bơsram mờ git wă mhar. Pơ-ùr añ kung pờ ơdŭ bơto tàñ ồi yau. Ală oh mi cau ùr tus bal kung gal mờ chờ hờp ngan”.

Ồng Y Xuyên tơlik nùs nhơm pơnyờ să bè ƀòn Jarah, sàh Nâm Nung dê là tiah pôs đồng kăc màng tàm rài tam lơh, là tiah gam prăp gàr bơta niam chài kòn cau Mnông dê. Ală hìu gam prăp gàr rơlao 20 pang cing, sùm tus bal mờ ală broă lơh chờ dờng. Làng bol ƀòn lơgar kung gam geh sùm broă tàñ ồi yau, tàñ phan. Hìu lơi kung geh drăp mờ git tàm broă ƀĕ tơrnờm ờs mờng kòn cau Mnông dê. Gam bè să tờm, ồng Y Xuyên đơs bè do: tơnơ̆ mờ tŭ dà lơgar geh tơnklàs, ồng lơh pơgru, hơ̆ sồng lơh Kwang lam bồ kwang bàng sàh, Phó Củ tịc Anih duh broă sàh, Phó Ƀí thư Đảng ủy sàh, hơ̆ sồng Củ tịc Anih duh broă Mặt trận Dà lơgar sàh tus nam 2008 den jơh sơnam lơh broă. Jơnau ồng kah sùm là tŭ pơnyờ să geh mŭt tàm mpồl Đảng pơgăp mờ do rơlao 40 nam. “Añ mŭt Đảng nam 1982. Añ neh lơh ngan tàm ală broă, bơsram bal sùm. Tơnơ̆ mờ tŭ bơsram jơh gah broă kwang àng, añ lơh cau lam bồ kwang àng sàh. Tài kơnờm mờ nùs nhơm pin dờn añ dê, dà lơgar hơ̆ sồng sồr añ lơh uă broă. Añ lơh jăt niam ală broă den hơ̆ sồng là đảng viên kloh niam, pràn kơl dang. Broă lơh Dà lơgar jào, lơh broă niam, den Dà lơgar hơ̆ sồng pơn jờng”.

Rơlao 30 lơh broă, hơ̆ sồng mờr 20 nam ơm jơh sơnam lơh broă, ồng Y  Xuyên kung gam kah sùm jơnau Wa Hồ bơto: “Añ kah sùm jơnau Wa Hồ bơto là ờ gơtùi sa kuề sa koà. Añ là dùl nă cau đảng viên pal kloh niam. Bơh lài tus tŭ do, añ kung gam sùm mblàng yal oh mi ƀòn lơgar in bè hơ̆. Oh kòn kis tam klăc bal, lơh ngan tàm broă lơh sa. Oh kòn ờ gơtùi bao rềp jơi nòi bal, kơnòm bơsram ờ gơtùi sơrbì bơsram nggùl gơl, pal lơh jăt adăt boh lam, ờ gơtùi lơh ờ niam tàm mpồl bơtiàn. Oh mi kis tàm do dờn jơnau Dà lơgar, dờng jơnau Wa Hồ bơto den hơ̆ sồng bơtàu tơnguh kơl jăp”.

Mò H’ Thương, Kwang lam bồ Mpồl Niam chài Mpồl bơtiàn gơwèt Mpồl Duh broă Làng bol sàh Nâm Nung, càr Lâm Đồng pà git, ồng Y Xuyên là dùl tàm ală cau geh làng bol pin dờn pơnrơ ngan tàm ƀòn lơgar dê: “Ồng Y Xuyên neh sơrlèt rơlao mờ uă broă lơh krơi is. Ồng wă uă ngan jơnau, den tàng sùm lam lài mờ bơto sồr làng bol in ală jơnau. Tàm ƀòn, ồng bơto làng bol in bè broă tam kao su, kơphe, tiêu mờ bơto tàm broă dròng cing, bơto đơs jơnau pơn đik, tàñ phan, lơh tờm gơnơng,… nàng mpồl ơruh pơnu in git mờ prăp gàr bơhiàn niam chài. Sờh Niam chài pờ ơdŭ bơto tàñ ồi yau, pơ-ùr ồng kung là cau bơto nàng ală oh mi cau ùr in. Jơh bàr nă ùr bơklao ndrờm là cau lam lài tàm broă prăp gàr bơta niam chài ờs mờng. Ồng gam lam ơruh pơnu tàm ƀòn bañ ntoăt rơndeh jờl ir, bañ ñô bơñul, bañ bao rềp jơi nòi bal”.

Mờ rơlao 40 sơnam Đảng, mờr 80 sơnam, ồng Y Xuyên sùm lam lài mờ jơh nùs tàm broă bơto ală bơta niam chài ờs mờng niam bơnĕ kòn cau Mnông dê nàng ală rơnàng oh kòn in prăp gàr.