Bơh rlau nggùl nhai do, ồng A Kiêu ơm tàm thôn Kon Long, sàh Đăk Tơ Lung, kơnhoàl Kon Braih, càr Kon Tum nggồr nggàc săp ñŏ nhơm chờ hờp. Ơm ntàu tàm hìu gam tàm tơngai lơh sir ồng đơs, hìu geh 6 n ă cau geh bal cau kra mờ cau kơnòm, hìu yau rềp kềng ồm sèt ñhăt dà mìu lơm den tàng tŭ trồ mìu pal jòi ngan den hơ̆ sồng geh anih ơm rañ rơsơh mờ sơƀìng đau bŭt. Geh Ƀí thư Ci ƀộ ồng A Tẻ hòi jà, jơh dồ hìu bơnhă ồng A Kiêu sơlơ kơ̆ tai bơta pin dờn sơrlèt bơta rơngòt “hìu he ờ geh bơta lơi” nàng lơh hìu pa: “Lài do, hìu bơnhă añ ơm kis tàm hìu ing, hìu ồm sèt ñhăt dà mìu lơm, trồ mìu là sùh jơh ờ geh anih nàng ơm bĭc tơn. Tŭ do hìu añ geh dà lơgar dong kờl 60 tơlak đong nàng lơh hìu pa. Hơ̆ sồng geh tai làng bol dong hìu bơnhă añ lòt ai, jun pơndiang lŭ, bràs, lŭ rơđeh rê tus nàng lơh hìu. Geh hìu cau gam pà he in tai sơmăng, ai cau dong lơh hìu mờ ờ gŏ sa priă. Hìụ pa mờr lơh gơs rao, kàl mìu nam do den jơh dùl hìu añ iang nùs ngan rao”.

Lơh jăt srơh tàm pơrlòng tàm sơm băt tê bal tơn jơh hìu ing, hìu ồm sèt, ñhăt dà mìu, Ci bộ thôn Kon Long gĭt nền tàm ƀòn geh 2 hìu bơnhă kờñ geh dong kờl lơh hìu pa, geh: hìu bơnhă ồng A Kiêu mờ bi Y Seng. Bơh broă lòt lài dong kờl 2 hìu làng bol lơh hìu bơh 9 nă đảng viên tàm ci bộ dê, 96 hìu làng bol tàm ƀòn dùl nùs bal lơh jăt. Ƀí thư Ci ƀộ ồng A Tẻ pà gĭt, kơnờm hòi jà geh bơta sơm băt tê bal, pơgồp bal pràn bơh làng bol ƀòn lơgar dê bal mờ nùs nhơm “hìu lơi geh bơta lơi dong bơta hơ’, tơl nơm hìu geh dà lơgar dong kờl 60 tơlak đong mơya mùl màl priă jền ngan ngồn lơh gơguh tus rhiang tơlak đong. Hìu bơh 2 hìu làng bol kal ke ngan rlau jơh dê tàm ƀòn den tàng bè hơ̆ kung niam tre, kơnhăp ngan sơl: “Làng bol jơh nùs jơh tồr ngan dong kờl ală hìu kal ke. Dong kờl là ndrờm ngan, dong kờl tă sờr hìu, tờ jrong. Ală mpồl cau thôn dê hòi jà làng bol dong kờl bè priă măt tơl hìu tă pơgồp 5 rbô đong. Làng bol dong pơndiang phan lơh hìu, dong tă găc. Làng bol jơh nùs jơh tồr ngan dong kờl”.

Càr Kon Tum geh 2 rbô 752 nơm hìu ing, tàm hơ̆ jơnau kờñ lơh pa mờr 2 rbô 200 nơm mờ lơh niam wơl rlau 560 nơm. Tềng đăp bơta geh ngan kes priă càr dê ờ tơl, uă hìu làng bol tàm tiah sar tiah ngài, tiah kal ke tàm jun pơndiang, ntrờn tơrgùm phan lơh hìu…Mpồl Sồr lơh lam lơh tơn jơh hìu ing, hìu ồm sèt ñhăt dà mìu ală kâp càr Kon Tum dê neh yờ tơngguh gơnoar broă lơh lài, lơh krơh bơh tơl nă đảng viên mờ kâp ủy mpồl đảng kâp hơđơm dê tàm dong kờl, dong ƀà làng bol lơh pa, lơh niam wơl hìu ơm. Ồng Nguyễn Văn Thủy, Phó Củ tịc Anih duh broă Làng bol kơnhoàl Kon Braih, càr Kon Tum pà gĭt, ờ mìng dong làng bol mờ bơr lơm, jơnau bơto sồr, dong kờl bè măy mŏk lơh hìu, ală Ƀí thư Ci ƀộ mờ đảng viên tàm kơnhoàl gam hòi jà tă pơgồp tai, hòi tơrgùm ală priă jền nàng lơh ală hìu geh lơh pa, lơh niam wơl sơlơ niam tre, kơ̆ kơnhăp ngan mờ bơta kwơ jơnhoa rlau mờ priă dong kờl: “Bơh bơta đơng lam sồr lơh bơh Huyện ủy kơnhoàl, Mpồl Lơh kơnòl broă sùm Huyện ủy kơnhoàl dê broă lơh tơn jơh hìu ing, hìu ồm sèt ñhăt dà mìu geh bơta dùl nùs bal tus bal dong kờl bơh kwang bàng, đảng viên dê hơ̆ sồng làng bol mờ mpồl bơtiàn làng bol ơm kis tàm ƀòn lơgar dê tai. Kwang bàng, đảng viên tus tơl hìu dong kờl, dong ƀà”.

Mùl màl pà gŏ rlau 440 nă Ƀí thư Ci ƀộ mơkung là Lam bồ thôn, Lam bồ jơnum làng bol tiah drà bal mờ gĭt nđờ rbô nă đảng viên càr Kon Tum dê neh geh tă pơgồp geh kwơ ngan, geh cồng nha tàm lơh ngan tơn jơh hìu ing, hìu ồm sèt ñhăt dà mìu ai làng bol in. Tus lồi nhai 3, càr Kon Tum lơh sir broă lơh pa, lơh niam wơl 1 rbô 776 nơm hìu. Ồng Nguyền Khắc Thời, Ƀí thư Ci ƀộ mơkung là Lam bồ thôn Kon Jri Xút, sàh Đăk Blà, ƀòn dờng Kon Tum yal: “Ci ƀộ geh 9 nă đảng viên, jơh ală đảng viên là cau tàm ƀòn lơgar tơn. Đảng viên pal là lơh krơh dong kờl ai cau rƀah in tơn jơh hìu ing, hìu ồm sèt ñhăt dà mìu. Ƀùi gờm chờ bồng bi dà lơgar pah poh, pah nhai, ci ƀộ mblàng yal hòi jà làng bol dong kờl ƀà cau nàng tơn jơh hìu ing, hìu ồm sèt ñhăt dà mìu”.

Ồng Nguyễn Duy Lơ, Ƀí thư Ci ƀộ mơkung là Lam bồ thôn Đăk Tang, sàh Rờ Kơi, kơnhoàl Sa Thầy, pà gĭt: “Mờ gơnoar broă là dùl nă Ƀí thư Ci ƀộ- Lam bồ thôn añ hòi jà làng bol tàm thôn mờ ơruh pơnu tus dong kờl làng bol, cau lơi geh bơta lơi den dong bơta hơ̆, geh cau den dong cau lơh hìu, geh phan den dong kờl phan. Pơgồp bal mờ priă jền bơh kâp hơđang dê dong kờl ai hìu bơnhă in lơh geh dùl nơm hìu gơ in geh niam tre rlau, kơ̆ kơnhăp rlau nàng làng bol in iang nùs lơh broă lơh sa tàm ală nhai mìu tus”.

Srơh tàm pơrlòng “Sơm băt tê bal tơn jơh hìu ing, hìu ồm sèt ñhăt dà mìu tàm làm jơh gùt lơgar tàm nam 2025” bơh càr Kon Tum dê lam lơh jăt ờ gŏ di mìng ơm wơl tàm broă tam gơl broă lơh hìu đam lơm mờ gam là dùl bơnah kwơmàng tàm broă bơ̆t bơtàu mờ lơh kơ̆ kơl jăp nùs nhơm pin dờn bơh làng bol dê gơ wèt mờ Đảng. Ală broă lơh loh làng, rềp mềl mờ rài kis bơh ală Ƀí thư Ci ƀộ mờ đảng viên tàm càr Kon Tum dê neh tơnggŏ loh gơnoar broă lơh lài, kơnòl bơh cau đảng viên dê tàm broă sền gròi dong kờl rài kis ai ală hìu làng bol gam kal ke in. Càr Kon Tum pơnđơl tus lồi nhai 06 nam 2025 rơ̆p lơh sir jơh broă lơh pa, lơh niam wơl hìu ing, hìu ồm sèt ñhăt dà mìu, dong jơh ală hìu làng bol rài kis kal ke tàm càr geh rài ksí niam rlau mờ iang nùs tềng đăp ală nhai mìu càl rbŭt dờng mờr tus.