Ngai 21/02, tàm ƀòn dờng Hồ Chí Minh neh geh lơh Dơ̆ tìp kâp dờng đah Ƀộ Cíñ trị Đảng Kộng sản Việt Nam mờ Mpồl Lơh kơnòl broă sùm Đảng Làng bol Campuchia (CPP) bơh Tổng Ƀí thư Mpồl Duh broă Đảng Kộng sản Dà lơgar Việt Nam ồng Tô Lâm mờ Củ tịc CPP, Củ tịc Thượng viện Campuchia ồng Hun Sen đơng lam bal. Do là broă lơh kwơmàng nàng kờñ tơngguh rlau tai gĭt gơ̆p lơgar ơm rềp bal niam bơnĕ, lơh bơyô bơh yau, lơh broă bal tơl làm, kơ̆ kơl jăp jŏ jòng đah bàr Đảng, bàr Dà lơgar mờ làng bol bàr lơgar Việt Nam mờ Campuchia tàm bơta pa.

Tàm dơ̆ tìp, Tổng Ƀí thư ồng Tô Lâm mờ Củ tịc CPP ồng Hun Sen neh yal ai gơ̆p in bè bơta tơl Đảng, tơl lơgar dê; cribơyai bè broă dunia, kơnhoàl ù tiah do mờ bàr pe tơnggme 2 đah sền gròi bal; sền swì cồng nha lơh broă bal đah 2 đah tàm tơngai lài mờ ring bal ală gùng dà broă lơh lơh broă bal tàm tơngai tus. Bàr nă Đơng lam bồ ring bal, pơn jăt tai lơh jăt geh cồng nha jơnau ring bal kâp dờng đah bàr Đảng, bàr lơgar, tơngguh tai lơh broă bal tàm broă sền gàr dà lơgar, lơngăp lơngai, chồl tơngguh lơh broă bal lơh sa, kă bro phan, niam chài, bơto bơtê, lòt nhơl ndrờm pal mờ jơnau tơl pràn, bơta pràn bơh tơl lơgar mờ gĭt gơ̆p đah 2 Đảng, bàr lơgar dê, mơkung tơngguh tai lơh broă bal geh cồng nha, ngan ngồn đah ală anih lơh broă Đảng, Quôk hội, ală ƀộ, gah Cíñ phủ, Mặt trận, ală mpồl làng bol mờ ală tiah bơh 2 lơgar dê, lơh gơlik tềl lời wơl pràn kơldang gĭt gơ̆p 2 lơgar tàm tŭ tơngai bơtàu tơngguh pa, drơng bơta kwơ geh ngan bơh làng bol 2 lơgar dê.

Tàm dơ̆ tìp, Thủ tướng Cíñ phủ ồng Phạm Minh Chính mờ Thủ tướng lơgar Campuchia ồng Hun Manet ring bal bàr pe tơnggume tờm kờñ gờñ lam lơh tàm tơngai tus, is ồn là lam lơh ală jơnau kơlôi lơh bè tàm tơrbŏ bàr rài lơh sa Việt Nam mờ Campuchia kung bè pe rài lơh sa Việt Nam, Campuchia mờ Lào.