Sền jơnau tàm Dơ̆ tơnkah kah wơl bơhiàn ală ngai do bơh 50 nam lài do dê, ling klàng mờ làng bol càr Bình Định neh pờ geh dơ̆ ntào tam lơh dờng tơnklàs ƀòn drà dờng Quy Nhơn mờ càr Bình Định tàm dơ̆ tam lơh kàl Prang nam pa 1975. Tam lơh pha lin ngai 31 nhai 03 tơnklàs Bình Định là pơrya àng gơcrà bơh broă lơh kờñ gơboh Dà lơgar mờ nùs nhơm ờ tŭ lơi kong tềng đăp bol sò tơm, là jơnau cih khin cha jak chài niam ngan bè nùs nhơm phi să dờng màng, nùs nhơm bồ tơngoh kăc màng kơ̆ dơn bơh ling klàng mờ làng bol he dê.

Tơnơ̆ 50 nam tơngklàs, Bình Định geh broă lơh sùm rề ơnàng, bơh dùl càr rƀah, tus tŭ do neh brồ guh ơm dơ̆ 5 tàm 14 tiah tàm tiah đah Tô tàm gùl Dà lơgar mờ kềng gah dà lềng tiah tàm gùl Dà lơgar mờ ơm dơ̆ 25 tàm 63 càr, ƀòn dờng jơh gùt lơgar. Tus bal mờ đơs tàm dơ̆ tơnkah, Lam bồ Mpồl mblàng yal bơto bơtê mờ Hòi jà Làng bol Dà lơgar ồng Nguyễn Trọng Nghĩa jờng rơ càr Bình Định neh geh ală broă lơh tam gơl pràn tàm broă tam gơl niam sră nggal gơnoar atbồ, gơ hòi gơ jà bơta bơcri priă, bơtàu tơnguh lơh sa mờ măi mok, lòt nhơl, drơng broă, bơto bơtê mpồl lơh broă jak, bơtàu tơnguh jak chài măi mok, lơh sa sồ.