Drim ngai 09/7, tàm Hà Nội, Mpồl sồr lơh tam gơl sồ tàm ală anih lơh broă Đảng bơyai lơh pơrjum sền swì cồng nha lơh geh tàm 6 nhai bồ nam mờ lam lơh kơnòl broă tàm tơngai tus. Đơs sồr lơh, Duh broă sùm Mpồl đơng lam Đảng Dà lơgar ồng Trần Cẩm Tú sồr mhar bơsong bơta ờ pràn mạng tàm ală ngai ngui uă tŭ ngui “Sră cih đảng viên điện tử”. Jơnau yal tàm pơrjum ai gŏ, broă lơh tam gơl sồ tàm ală anih lơh broă Đảng geh uă bơta tam gơl niam bè lơh sir kơrnuat boh lam, bơt bơtàu bơnàng jă mờ ngui ală anih ngui bal. Bulah bè hơ̆, tơngai lam lơh 2, 3 bơnah broă gam lơyài, cồng nha lơh broă ờ hềt ndrờm bal.

Duh broă sùm Mpồl đơng lam Đảng Dà lơgar jàu Cơldŭ lơh broă Đảng Dà lơgar mhar yal lơh jat broă lơh tam gơl sồ kâp càr, kâp sàh; mờ kung pơgồp bal mờ ală mpồl lơh broă, cau tờm lơh broă bơsong jơh ală bơta gơ kòl bè măi mok, lơh ƀuơn ală broă lam lơh tàm anih đơng lam lơh jat broă lơh.