Tơl càr tàm tiah do ndrờm geh 5 tus 6 nă cau ala mat tus bal Pơrjum dờng ơruh pơnu pơn rơ jak lơh jat jơnau bơto Wa Hồ dơ̆ 8 tàm ƀòn dờng Hồ Chí Minh. Di dơ̆ do, Tỉñ đoàn càr Dăk Nông bơyai lơh jờng rơ 28 nă ơruh pơnu geh pơn rơ gơguh jak lơh jat jơnau bơto wa Hồ mờ 17 nă đảng viên kơnòm să geh pơn rơ jak càr Dăk Nông tơngai bơh nam 2023 tus nam 2025. Kung di dơ̆ do, Mpồl đơng lam Đoàn dà lơgar neh jàu Ƀằng khen ai 2 nă cau dồ nă să, 1 mpồl bal mờ Tỉñ đoàn Gia Lai jàu Ƀằng khen ai 5 nă cau dồ nă să, 5 mpồl bal tài neh geh cồng nha jak ngan tàm lam lơh Broă lơh jơnau kờñ dà lơgar bơt bơtàu ƀòn lơgar pa tơngai bơh nam 2021 tus nam 2025.

Bi Kpuih Rung, Ƀí thư Đoàn sàh Hla, kơnhoàl Chư Pưh, càr Gia Lai pà git bàr pe broă lơh sàh dê: “Tơngkah kir sơnrai ngai deh Wa Hồ dê, Đoàn ơruh pơnu sàh Ia Hla bơyai lơh uă broă lơh geh kuơ mờ ngan ngồn. Mùl màl, Đoàn ơruh pơnu sàh pơgồp bal mờ Mpồl cau ùr mờ ală mpồl ndai lam lơh dơ̆ tìp mat, pơrjum cribơyai mờng chài lơh broă mìng tơngume bè Wa Hồ, kah wơl bơhiàn kac màng, lam lơh nhơl ñŏ lơh prài bồ tơngoh, niam chài đơs crih tamya, tàp pràn să jan bè jơnau đơs crih jờng rơ Wa Hồ mờ pơrlòng nhơl bơlai… Bơdìh hơ̆ tai, gam bơyai lơh broă lơh dong kờl cau, pà phan kơnòm dềt kuet kơlte in, còp mờ pà phan cau lơh broă jŏ nam, ală hìu bơnhă geh sră bơh dà lơgar in”.