Broă lơh geh bơyai lơh tàm kơnhoàl ù tiah gùng Anh hùng Núp mờ Ƀlàng dờng Tam Klăc dờng, ƀòn dờng Pleiku, dùl anih ƀươn nàng lơh gơrề uă jơnau đơs bè bơta kwơ bơh kơphê Gia Lai dê. 40 mpồl lơh sa kă bro mờ hìu làng bol lơh broă sa tàm ală mpồl sơnđờm mŭt lơh kơphê neh geh cơldŭ ràng tăc phan mờ phan bơna mùl gŏ is dê tàm broă lơh bal mờ kơ̆p kờñ sơm băt tê bal pơgồp bal pràn ngui niam ală bơta kwơ is bơh kơphê Gia Lai dê. Mò Nguyễn Thị Nga, Phó Kwang Lam bồ Mpồl Lơh broă bal Broă lơh sa sươn sre Drơng broă Nam Yang, yal: “Bơh broă lơh dơ̆ do, bol hi kơ̆p kờñ yal tơnggĭt uă kơphê Đăk Yang đơs is mờ kơphê Gia Lai đơs bal lòt tus mờ gơ̆p bơyô tàm lơgar mờ ală lơgar, ai kơphê Gia Lai gơguh tus dùl bơngă jơnhoa pa. Kơphê bơkah”.

Mờ jơnau kờñ tơngguh bơngă kơphê tàm càr, Gia Lai Coffee Festival tơrgùm tàm ală broă lơh gĭt gŏ kơphê, bè: lòng hùc dà kơphê niam uă, săc rwah kơphê gar; lơh ai cau in sền bơta chài coh mờ lơh gơlik; pơrlòng klài mờ tìp măt lơh kwèng- tàm tơrbŏ gah phan…Mò Nguyễn Thị Thanh Tâm, Lam bồ Mpồl bơyai lơh, yal: “Gia Lai Coffee Festival là dùl broă lơh mpồl bơtiàn mờ jơh ală broă lơh tàm broă lơh do rơ̆p geh lơh jăt concept là bơh sươn lơh broă sa sươn sre tus khòc dà kơphê. Kơ̆p kờñ là tiah tam kơphê niam uă, Gia Lai geh sơlơ ngai sơlơ geh gĭt tus uă rlau mơkung là khà lơh gơrề mờ tàm tơrbŏ bơh ală hìu làng bol lơh broă sa dê ngai sơlơ pràn kơldang rlau mờ ală mpồl sơnđờm mŭt lơh broă phan kơphê tàm ƀòn lơgar gơ kung bơtàu tơngguh dồ bă kơ̆ kơl jăp sơl”.

Tơnơ̆ dơ̆ bơyai lơh geh cồng nha tàm nam 2023, nam do Gia Lai Coffee Festival geh broă lơh rơ̆ ru rlau; là tiah cau ngui sa lùp kờñ gĭt bè gar kơphê mờ jơnau yal gùt dar phan bơna tờm pràn càr dê…Jăt bi Nguyễn Văn Hoà, Lam bồ ala măt cơldŭ Lab gơ wèt Anih kơlôi sơnơng Bơta niam kơphê dunia tàm lơgar Việt Nam, broă lơh do gam sùm lơh sir, lơh gơlik bơta gơdan ai mpồl bơtiàn kơphê Gia Lai in brồ guh tus bơta li la mờ bơta niam: “Tŭ do, añ gam drơng kơnòl gah lòng hùc mờ sền swì bơta niam kơphê rlau 48 bơta phan bơh càr Gia Lai dê nàng săc rwah geh ală bơta phan nàng tàm nam tơnơ̆ rơ̆p rơcăng dơ̆ pơrlòng kơphê bơkah Gia Lai. Lơh bè lơi nàng lơh gơlik geh bơta gơdan, lơh ngan pơnđơl mờ pràn kơnòm să, bơta kờñ ngan mờ jơh nùs jơh tồr nàng bơtàu tơngguh gah phan kơphê tàm Gia Lai”.