Kờp tus bồ nhai 6 nam 2026, rơndăp broă lơh Hìu bơsram Bal ơm sa bĭc tơn ală kâp Kâp dùl mờ Kâp Bàr tàm 7 sàh nhàr lơgar đah măt tơngai Mŭt càr Gia Lai dê neh lơh sir pơgăp 50% bơnah broă lơh. Bulah bè hơ̆, jơh 7 hìu bơsram tŭ do kung gam lơyài tơngai pơrgon lơh gơs pơgăp bơh 15 tus 52 ngai pơndrờm mờ broă rơndăp lơh.

Mpồl Ătbồ ală rơndăp broă lơh bơcri priă bơ̆t bơtàu càr Gia Lai sồr, bơh tŭ do tus jơh ngai 30 nhai 8 tus, ală mpồl lơh broă tus bal dơ̆ lơh uă, tơrgùm uă ngan rlau jơh bơta pràn, sền nền wơl tơngai pơrgon lơh sir tơl bơnah broă, bơtơl cau lơh broă, măy mŏk mờ lam lơh broă sùm nàng kờñ lơh sir jơh ală broă bơ̆t bơtàu. Ală mpồl bơto pơlam, jăt sền pal sùm ơm rềp tàm tiah lơh broă, sok sền kràñ bơta niam, niam lơngăp lơngai lơh broă, ờ gŏ di tài kơn jơ̆ tơngai pơrgon lơh mờ gơrềng tus bơta niam broă bơ̆t bơtàu. Ồng Phạm Xuân Điệp,  Lam bồ Mpồl Ătbồ rơndăp broă lơh bơcri priă bơ̆t bơtàu càr Gia Lai pà gĭt:

"Geh 2 broă kwơmàng ngan rlau jơh là bơsong ală kal ke gơkòl bơh cau tờm lơh broă tàm tiah lơh broă bơ̆t bơtàu dê, nàng cau tờm lơh broă in lam lơh ƀươn soh. Dơ̆ bàr là mpồl rơ̆p pơgồp bal mờ ală ƀòn lơgar, mpồl lơh broă mờ ală cau tờm lơh broă nàng hòi tơrgùm mpồl cau dong kờl nàng tơngguh tai cau lơh broă bơtơl ai cau tờm lơh broă in”.

Tàm dơ̆ lam lơh, cau tờm bơcri priă, mpồl bơto pơlam jăt sền mờ ală cau tờm lơh broă neh kĭ hơ lơh di tơngai pơrgon lơh, niam mờ niam lơngăp lơngai lơh broă, jơh nùs lơh ngan lơh sir jơh rơndăp broă lơh jăt di jơnau sồr bơh Bộ Chính trị, Chính phủ mờ Anih duh broă Làng bol càr Gia Lai dê. Ồng Trần Bảo, Phó Kwang Lam bồ dờng Kông ty Kong kơnòl nă să is Bơcri priă Bơ̆t bơtàu Dacinco, mpồl lơh broă Hìu bơsram Bal ơm sa bĭc tơn ală kâp Dùl mờ Bàr Ia Dom yal broă lơh bơsong bơh mpồl dê bè do:

“Trồ tiah tŭ do, ngai lơi kung mìu bơh 2 tus 3 dơ̆. Bol hi geh broă lơh mơ tơn là geh 5 tus 6 broă lơh bơsong lơh jăt. Dơ̆ dùl là ai tai cau lơh broă, tŭ do tơl anih hìu bơsram, bol hi geh 320 nă cau lơh broă. Dơ̆ bàr là pal geh tơngguh dơ̆, tơngguh mpồl lơh broă sùm, 2 tus 3 dơ̆ pah mang. Trồ mìu, bol hi rơ̆p geh broă lơh bơsong tơngguh dơ̆ lơh broă bơsir wơl. Mơkung tơngguh tai kỹ sư jăt sền nàng gàr bơta niam rơndăp broă lơh dê”.

Rơndăp broă lơh Hìu bơsram Bal ơm sa bĭc tơn ală kâp Kâp Dùl mờ Kâp Bàr tàm càr Gia Lai geh priă bơcri kờp jơh rlau 1 rbô 516 tơmàn đong, geh lam lơh tàm 7 sàh nhàr lơgar geh: Ia Mơ, Ia Púch, Ia Pnôn, Ia Nan, Ia Dom, Ia Chiá, mờ Ia O. Tŭ lơh sir, rơndăp broă lơh rơ̆p drơng rlau 7 rbô nă kơnòm bơsram in bal mờ ală hìu bơsram cơldŭ bơsram, hìu ơm bal kơnòm bơsram in, hìu sa, tiah ơm cau pơgru in mờ ală broă bơ̆t bơtàu dong kờl ndai ndrờm bal. Rơndăp broă lơh geh gơtha kwơmàng ngan tàm tơngguh uă bơta niam bơto bơtê tàm tiah nhàr lơgar càr Gia Lai dê.