Đơs sồr lơh tàm dơ̆ bơyai lơh, ồng Phạm Anh Tuấn – Phó Ƀí thư Tỉñ ủy, Củ tịc Anih duh broă làng bol càr Gia Lai jờng rơ gơnoar broă bơh mpồl kwang àng càr Gia Lai dê tàm broă gàr kơ̆ lơngăp lơngai cíñ trị, rơndap tap sèng lơngăp lơngai mpồl bơtiàn tàm tơngai lài. Mờ kung sồr jơh gùt mpồl kwang àng pơn jat tai lơh niam gơnoar broă lơh tờm, pơgồp bal jơh nùs mờ ală gah broă lơh, mpồl cau, gơnoar atbồ ƀòn lơgar lam lơh geh cồng nha 5 kơnòl broă tờm. Tàm hơ̆ đơs sùm tus jơnau sồr git loh bơta geh ngwn bơh tàm kâp hơ đơm, bơsong di tŭ ală jơnau pơhìn gơlik geh cau tìs, kràñ cê lơh glài ală bơta cau tìs, ờ lời gơ mòn gơs ală anih tơrgùm kal ke pa; ờ lời gơtìp rơmơp ndơl, nisơna tàm tơl broă gơlik geh.

Ồng Phạm Anh Tuấn đơs sùm: “Jơh gùt anih lơh broă cíñ trị tàm càr ngui niam nùs nhơm rơcang lài, bơceh lơh, kràñ cê, sơrbac mhar mờ geh kơnòl tàm kơnòl broă gàr niam lơngăp lơngai rơndap tap sèng, gàr kơ̆ bơta lơngăp lơngai ù tiah ƀòn lơgar, lơh gơlik bơnàng jă kơ̆ kơljap nàng drơng làng bol in ngai sơlơ niam rlau. Pơn jat tai bơt bơtàu mờ tơnguh cồng nha srơh jơh gùt làng bol sền gàr lơngăp lơngai dà lơgar, ngui niam bơta pràn tơrgùm bal bơh jơh gùt anih lơh broă cíñ trị dê tàm broă gàr kơ̆ lơngăp lơngai rơndap tap sèng, bơh hơ̆ lơh gơs srơh tàm pơrlòng duh hồl, ngan ngồn, geh cồng nha ai tơl rơnàng làng bol in”.

Đơs dờp kơnòl broă, Thiếu tướng ồng Lê Quang Nhân, Kwang lam bồ Kwang àng càr Gia Lai pà git: dơ̆ lơh broă uă dơ̆ do là broă lam lơh jat ngan ngồn jơnau sồr lơh bơh Tỉñ ủy, Anih duh broă làng bol càr Gia Lai mờ Ƀộ Kwang àng dê, ai tơnggŏ bơta pơnđơl pràn cíñ trị tàm broă sền gàr rài kis ring lơngai bơh làng bol dê,  gàr kơ̆ lơngăp lơngai rơndap tap sèng, drơng bơtàu tơnguh lơh sa mpồl bơtiàn ƀòn lơgar dê.

Bơh tŭ do tus nggùl nhai 9, jơh gùt mpồl kwang àng rơp tơrgùm kơryan uă ală bơta cau tìs hìñ sự ngòt rơngơt, cau tìs geh mpồl bal, ai càn priă sa priă cồng uă, sền gàr ală broă lơh ờ niam in, ma tuý, tung kơñau, lơh tìs adat boh lam bè tiah ơm kis, tơnhàu phan kuơ tàm ù tìs mờ adat boh lam mờ ngui măi mok pa nàng lơh tìs.

Dùl tàm ală bơta pa là broă Kwang àng càr Gia Lai crơng gơs mờ ai mpồl lòt sền bơrlŭ bal 151 – geh 2 mpồl kâp càr mờ 135 mpồl kâp sàh, pơgồp bal lòt sền mờng chài mờ phàu crong, bơyai lơh sền gròi kơ̆ tàm ƀòn lơgar. Mpồl do rơp bơsong kràñ cê ală broă lơh aniai tus rơndap tap sèng mpồl bơtiàn, tơrgùm tàm pơrlòng rơndeh tìs mờ adat boh lam, cau tìs tàm gùng mờ ală anih gơlik geh uă broă lơh tìs bè lơngăp lơngai rơndap tap sèng. Thiếu tướng ồng Lê Quang Nhân đơs nền: “Jơh gùt kwang bàng, cau ling kwang àng gùt mpồl rơp pơn jat tai tơnguh nùs nhơm brồ guh, tam klac bal, ring bal, pơnđơl pràn lơh ngan sơrlèt gan tơl bơta kal ke, bơta lòng, lơh ngan lơh gơs jak kơnòl broă geh jàu, sùm cih kah tàm nùs tồr mờ lam lơh gơtùi jơnau song tài lơgar huĭ să tờm, tài làng bol mờ drơng lơh, nùs nhơm là bơta dờng màng ngan rlau jơh. Jơh gùt mpồl kwang àng càr rơp ngai sơlơ pơnđơl pràn, lơh ngan, ngui niam gơnoar broă là mpồl tờm ngan tàm broă lơh gàr lơngăp lơngai rơndap tap sèng, pơnđơl pràn lơh gơs niam tơl kơnòl broă”.

Tơnơ̆ bơnah bơyai lơh jat bơhiàn ờs mờng, gal ngan kwang bàng, cau ling kwang àng neh bơyai lơh võ thuật lơh bal mờ phan tam lơh, bơnah bơyai lơh niam ngan ai tơnggŏ bơta pràn să jan, bồ tơngkh kơ̆ dơn mờ nùs nhơm crăp rơcang tam lơh bơh mpồl kwang àng làng bol dê. Tàm dơ̆ ai cau lơh broă, Kwang àng càr kung bơyai lơh ai lòt tàm gùng git nđờ jơt nơm rơndeh ờs mờng pa ngan bè rơndeh kơryan gar phàu, rơndeh lơh pơng gàr kơryan barrie, rơndeh ƀồm dà dră wơl bơta tàu dră, rơndeh dong kờl rềs àr uă bơta kuơ, rơndeh đơng lam rơcang lài kơryan crùh ồs sa, rơndeh mblàng yal làm bă tiah, rơndeh ntùng crùh ồs sa, rơndeh pơndiang phan kis mờng chài… lơh gơlik nùs nhơm duh hồl, crăp rơcang ơm gak, tam lơh mờ dong kờl rềs àr tàm tơl bơta gơlik geh.