Mang ngai 6/08, Củ tịc lơgar ồng Lương Cường mờ pơ ùr bal mờ mpồl ala mat kwang bàng kấp dờng lơgar Việt Nam neh tus càr lơgar Lu-an-đa (Luanda), sơnđờm dơ̆ lòt còp kấp Dà lơgar Kộng hoà Angola jat jơnau jà bơh Kwang atbồ lơgar Angola ồng João Manuel Gonçalves Lourenco  mờ pơ ùr. Do là dơ̆ lòt còp kấp dờng ngan rlau jơh bơh đơng lam bồ lơgar Việt Nam dê kờp bơh nam 2008.

Dơ̆ lòt còp bơh Củ tịc lơgar ồng Lương Cường dê geh bơyai lơh di tŭ tơngai 2 lơgar tơngkah kir sơnrai 50 nam lơh geh bơta gĭt gơ̆p cribơyai broă mờ lơgar ndai. Kờp dŭ tàm tơngai bơh ngai 6 tus ngai 8/08, Củ tịc lơgar ồng Lương Cường rơ̆p geh ală dơ̆ tìp mat kấp dờng mờ Kwang atbồ lơgar Angola ồng João Manuel Gonçalves Lourenco; tìp mat kấp dờng Củ tịc Quôk hội lơgar Angola mò Carolina Cerqueira; lơh broă mờ đơng lam bồ Đảng Srơh làng bol tơngklàs Angola; tìp mat mpồl bơtiàn cau Việt Nam tàm Angola mờ tus bal dơ̆ tơngkah kir sơnrai 50 nam lơh geh bơta gĭt gơ̆p cribơyai broă mờ lơgar đah 2 lơgar dê. Is ồn, Củ tịc lơgar rơ̆p geh jơnau đơs kwơ màng tàm Quôk hội Angola, bơh hơ̆ yal tơngĭt jơnau yal broă lơh bè dùl Việt Nam kơ̆p kờñ tă pơgồp dờng rlau tai tàm rài cíñ trị dunia, lơh sa gùt plai ù mờ niam jak jơi bơtiàn kòn bơnus dê.