Mờ tơngu me: “Pơrlòng tơnguh nhar, pràn bơ̆t bơtàu mpồl Kwang àng làng bol mùl màl kloh niam, pràn kơl dang, jăk chài, ngăc ngar, lơh pa”, Pơrjum dờng Pơrlòng “Tài lơngăp lơngai Dà lơgar” dơ̆ 9 geh Ƀộ Kwang àng bơyai lơh tàm mang ngai 06 nhai 8 tàm Hà Nội. Geh 246 nă cau pơnrơ jăk, ala măt git nđờ rơbô nă cau jăk, git nđờ jơ̆t rơbô nă cau “cau niam, broă niam” tàm Broă Pơrlòng “Tài lơngăp lơngai Dà lơgar” mờ Broă “Gùt làng bol sền gàr lơngăp lơngai Dà lơgar”, Khin cha jăk chài Mpồl ling klàng phào crong làng bol bal mờ ală cau ling pơrlòng gùt lơgar tus Pơrjum dờng.

Đơs tàm Pơrjum dờng, Thủ tướng Cíñ phủ ồng Phạm Minh Chính đơs nền, ală cồng nha, cồng nha pơnrơ ngan bơh mpồl Kwang àng làng bol neh pơgồp bal kwơ màng tàm broă gàr kơl jăp cíñ trị, bơ̆t bơtàu mpồl bơtiàn ngai sơlơ gơguh jăk, lơngăp lơngai, niam bơnĕ, rài kis Làng bol lơngăp lơngai, gơboh gơbài, hờm ram, ai geh tiah kis ƀuơn nàng bơtàu tơnguh dà lơgar. Mờ uă ngan broă lơh, jơnau bơceh lơh niam, Broă pơrlòng “Tài lơngăp lơngai Dà lơgar neh lơh pràn broă tam gơl pa, bơceh lơh, lơh jăt ală gùng dà broă lơh lơngăp lơngai ndrờm bal, geh cồng nha; pơgồp bal tàm broă lơh gơs broă sền gàr lơngăp lơngai jŏ jòng; lơh pràn broă tus bal uă, pràn bơh mpồl lơh broă cíñ trị, làng bol tàm broă sền gàr Dà lơgar. Thủ tướng sồr mpồl Kwang àng làng bol pơn jăt tai tơnguh bơhiàn ờs mờng  tam klăc bal, pơrlòng lơh jăk kơnòl broă bơ̆t bơtàu bơta lơngăp lơngai làng bol, gàr kơl jăp lơngăp lơngai làng bol pơgồp bal mờ nùs nhơm làng bol kơ̆ kơl jăp; sền gàr niam lơngăp lơngai cíñ trị, lơngăp lơngai mpồl bơtiàn, prăp gàr tiah kis ring lơngai, kơl jăp nàng bơtàu tơnguh dà lơgar.