Tơnơ̆ dùl nhai lơh broă gơnoar atbồ ƀòn lơgar 2 kấp, Dăk Lăk pa cih dờp broă lơh mhar bè phan ngui jak chài- măi mok, mơkung kong mờ bơta ngài dờng đah ală sàh, sơnah ƀòn tàm tam gơl sồ mờ tam gơl niam sră pơ àr gơnoar atbồ. Càr neh lơh sir 96 kơnòl broă jat di tŭ tơngai Jơnau lơh nền tàm pơrjum sồ 71 bơh Cíñ phủ dê, mơkung tơmŭt lơh broă lơh ală pơrjum pờ tơlik tơn tàm internet tus jơh gùt 102 sàh, sơnah ƀòn mờ tàm tơrbŏ bal camera jat sền tàm anih tờm sră pơ àr gơnoar atbồ Dà lơgar ală tiah dê. Mơya, ngan ngồn pà gŏ “bơta kòl yal” phan bơna bơt bơtàu tàm càr Dăk Lăk kung gam ờ hềt dồ ròt bal. Uă sàh kung gam ờ hềy geh măi ai sồ, là phan bơna sồr pal geh jat jơnau sồr dê.

Tàm gơ lin bè khà sră nggal tàm internet đah ală sàh, sơnah ƀòn dờng ngan; geh tiah mìng dờp bơh 3 tus 5 sră nggal pah ngai. Bè mpồl cau lơh broă, ết ngan kwang bàng kấp sàh, sơnah ƀòn geh bơto bơtê jrô ờs mờng bè măi mok yal tơngĭt jơnau. Tŭ do càr Dăk Lăk gam lơh 2 ală jơnau neh lơh nền bè bơtàu tơnguh jak chài- măi mok, tam gơl pa bơceh lơh mờ tam gơl sồ jơh gùt càr nàng lơh bơnàng jă ai tơngai bơtàu tơnguh pa in. Mờ càr kung sơlơ tơnguh tai kờp sền, săp sèng mpồl lơh broă di pal nàng gàr niam lơh jai gơnoar broă, kơnòl broă pa tàm broă lơh gơnoar atbồ ƀòn lơgar 2 kấp.