Tàm khà 22 nơm hìu kờñ geh lơh pa tàm sàh Gào, ƀòn dờng Pleiku, hìu bơnhă ồng Siu Kra (ơm tàm ƀòn C) geh rơwah lơh tiah sơn đờm mut lơh. Ồng Siu Kra brơn brài đơs:“Añ chờ hờp ngan, ưn ngài ƀòn dờng neh dong kờl ai hìu bơnhă añ in là hìu bơnhă kal ke kờñ lơh niam wơl hìu ơm, geh hìu ơm pa, 2 nă ùr bơklau añ iang nùs ngan”.

Jat bră rơndăp lơh, ƀòn dờng Pleiku rơ̆p lơh pa 41 nơm hìu mờ lơh niam wơl 28 nơm hìu mờ khà priă dong kờl 60 tơlak đong dồ nơm hìu lơh pa mờ 30 tơlak đong dồ nơm hìu lơh niam wơl. Ồng Trịnh Duy Thuân, Ƀí thư Thàñ ủy ƀòn dờng Pleiku, pà gĭt:“Ƀòn dờng Pleiku tơn jơh hìu lơh ing, hìu sèt ñhăt dà mìu 69 nơm hìu, bol añ sền gĭt tơngai lơh jơh tàm nhai 4 nam 2025, sồr ală kấp, ală gah  broă, ală tiah dong kờl kràñ cê jơh nùs. Mờ tŭ tơngai gơ jal ngan bè hơ̆, ală mpồl lơh broă, mpồl ling klàng, ală mpồl lơh sa kă bro, ală gah broă ală kấp, ală tiah lơh jat niam nùs nhơm tàm dong tàm kờl bal, jơh nùs lơh ngan lơh jat broă lơh do jat di jơnau kờñ mờ tŭ tơngai dê neh geh ai”.

Đơs bè bơta tàm sơm bat tê bal tă pơgồp dà kơl hề tàm broă tơn jơh hìu lơh ing, Trung tá ồng Ngô Văn Phôi, Phó Kwang lam bồ Trung đoàn 48, Sư đoàn 320, Mpồl ling 34, đơs loh:“Bol añ neh tơlik mat Mpồl sồr lơh, tơnggơs ală mpồl lơh broă mờ pơgồp bal niam mờ ală tiah, is ồn là  ală thôn, ƀòn, lam lơh gàr niam tiah ơm, sa sào, sơnđờm mut lơh ală broă lơh jat di broă rơndăp lơh nàng lơh sir niam broă lơh bơh Cíñ phủ mờ ală tiah dê neh ai”.

Bal mờ Pleiku, jơh ală tiah tàm càr Gia Lai kung gam gơ jal ngan lơh ngan lơh sir broă lơh tơn jơh hìu lơh ing, hìu sèt ñhăt dà mìu tàm qúy 2 nam 2025. Là dùl tàm ală cau geh dong kờl lơh hìu pa, bi Puih Lý (ơm tàm ƀòn Đe Chi, sàh Ia Pếch, kơnhoiàl Ia Grai) ngoh rơngăc đơs:“Dà lơgar sền gròi lơh geh ală bơta lơh dồ nơm hìu ơm mờ pà 1 nơm kơnrồ dra, nam tus do 2 nă ùr bơklau añ pơn đơl pràn lơh ngan lơh bè lơi nàng lik klàs rƀah, geh ală bơta nàng kơlôi rcang ai oh kòn in bơsram sră”.

Mò Phạm Thị Kim Tuyến, Phó Củ tịc Anih duh broă Làng bol sàh Ia Pếch, tơngŏ bơta chờ hờp bè cồng nha bơh broă lơh dê: “Do là broă lơh dờng màng uă ngan mờ geh  kwơ ngan gơwèt mờ cau rƀah. Tus tŭ do sàh gam pơgăp 20 hìu bơnhă kal ke bè hìu ơm, sàh pơgồp bal mờ mpồl, gah broă kờp sền nền nòn ngan nàng broă lơh in lơh jat niam ngan rlau jơh cồng nha tŭ lam lơh”.

Jat broă rơndăp lơh, càr Gia Lai ai jơnau kờñ lơh sir lơh pa mờ lơh niam wơl rlau 8 rơbô 400 nơm hìu tàm qúy 2 nam 2025. Nàng lơh jat broă lơh tơn jơh hìu lơh ing, hìu sèt ñhăt dà mìu tàm jơh gùt càr, Gia Lai kờñ geh priă jền gơguh tus mờr 460 tơmàn đong. Tàm hơ̆ Dà lơgar neh dong kờl ai càr in là 241 tơmàn đong, 87 tơmàn đong bơh priă tềm pềr tă ngui 5% bơh càr mờ ală tiah dê. Ồng  Hồ Văn Niên, Ƀí thư Tỉñ ủy càr Gia Lai pà gĭt, càr gam pơn đơl pràn lơh ngan hòi jà tă pơgồp bal priă jền gam ờ hềt tơl nàng lơh sir jơnau kờñ do: “Kung gam 127 tơmàn đong càr ờ hềt geh den pal pơn jat tai hòi jà bơta dong kờl, den tàng sồr Mpồl Sồr lơh càr dê pơn jat tai lơh  broă mờ ală anih lơh broă Dà lơgar is ồn là Anih duh broă Mặt trận Dà lơgar Việt Nam nàng pơn jat tai geh dong kờl tai gơwèt mờ càr Gia Lai. Ală kwang bàng tàm Mpồl sồr lơh càr dê lơh jat niam nùs nhơm geh kơnòl, lòt sền, bơto pơlam mờ gĭt ală bơta lam lơh jat tàm ală tiah neh geh tàm jàu, yal cồng nha geh ngan mờ Mpồl Sồr lơh càr dê lơh sùm pơrjum pah nhai nàng sền wơl cồng nha lơh jat geh tàm tơl nhai”.