Gia Lai gam mut tàm kàl prang uă, pơhìn ồs sa brê tàm khà yal tơngĭt lài kấp 5- kấp sơbơng roh ngan. Tŭ do, gĭt nđờ rơhiang rơbô lồ brê tàm jơh ală kơnhoàl bơh càr Gia Lai dê gam kong mờ bơta pơhìn ồs sa tàm nggùl kàl prang. Tàm hơ̆, kơnhoàl Chư Păh geh rlau 7 rơbô 169 lồ, tơrgùm tàm ală sàh Hòa Phú, Nghĩa Hưng, Chư Đang Ya, Đăk Tơ Ver, Ia Khươl mờ ƀòn drà dềt Phú Hòa gơwèt mpồl ồs sa sơbơng roh ngan. Is ồn, brê nho 3 nha mờ rŭ rơm uă ngan là tiah ƀuơn ngan gơtìp ồs sa.

Nàng kờñ tơrmù pơhìn ồs sa, bơh bồ kàl prang, ală tiah tàm ù tiah càr Gia Lai neh pồ tơl Mpồl đơng lam rcang lài kơryan ồs sa mờ crùh ồs sa brê, bơt bơtàu broă rơndăp lơh drơng lài. Mpồl lơh broă geh gơnoar sơlơ tơnguh tai mblàng yal, bơto pơlam làng bol ngui ồs lơngăp lơngai, jat sền niam tàm ală nhai kàl prang uă. Ală mpồl atbồ brê pơgồp bal mờ gơnoar atbồ ƀòn lơgar mờ mpồl sền gàr brê lam mblàng yal tàm ală thôn, ƀòn; tơngkah làng bol geh mìr tềp nhàr mờ brê ờ gŏ di ngui ồs khat gơboh, mơkung crăp kơƀàng yal tơngĭt lài tàm ală tiah tờm ngan dê.