Ală ngai ơm rlô chờ, ồng Phạm Xuân Hương bal mờ ală hìu làng bol ƀòn O Sơr, sàh Ia Kênh, ƀòn dờng Pleiku sùm lòt sền brê geh jàu bă bơh Mpồl ătbồ brê rơcăng gàr bồ too đah Tô Biển Hồ. Ồng Phạm Xuân Hương, pà gĭt: “Lơh jăt kơnòl broă den ală hìu dờp bă brê neh tơngguh uă gơnoar broă geh kơnòl. Lài ngan lùp bơsram broă lơh mờng lơh bè adăt bơtàu tơngguh brê sền gàr brê, lơh jăt broă lòt sền brê pah ngai. Is ồn sền gròi mblàng yal làng bol, ală hìu bơnhă lơh mìr gùt dar kơnhoàl ù tiah brê nàng ờ chu brê, mus kơl brê, sơgràm brê”.

Mpồl ătbồ brê rơcăng gàr bồ tô dà đah Tô Biển Hồ gam ătbồ rlau 9 rbô lồ brê, gơdă jòng bơh ală kơnhoàl Chư Păh, Ia Grai, Đak Đoa mờ ƀòn dờng Pleiku. Tàm tơngai kàl prang dờng, jơh mpồl mờng lơh kơnòl broă neh geh hòi tơrgùm tus drơng sền tàm bă brê tờm kwơmàng. Ồng Nguyễn Tất Thành, Lam bồ mpồl ătbồ brê rơcăng gàr bồ tô dà đah Tô Biển Hồ, yal: “Bơh bồ kàl prang, mpồl neh lam lơh jăt lơh gùng bơkăng kơryan ồs, chu tềng đăp geh bơta đơng pơlam, mpồl neh pơrjum mờ lam jơh ală mpồl ătbồ sền gàr brê. Tàm kàl prang mpồl neh rơndăp tai 5 anih tàm ală bă brê tam geh mpồl sền gàr brê bơh mpồl dê mờ ală hìu dờp bă brê nàng tàm ala gơ̆p drơng sền nàng gŏ di tŭ bơsong jăt jơnau đơs 4 dùl bă tiah”.

Jơh gùt càr Gia Lai geh 286 tiah tờm kwơmàng geh jơnau pơhìn ồs sa brê kâp V, mờ bă brê ơnàng rlau 124 rbô lồ, mìng là brê tam, brê geh is nha dờng mờ brê rơha chi che. Ồng Trương Văn Nam, Ci kụk Broă lơh brê bơnơm sền gàr brê càr Gia Lai pà gĭt: “Ci Kụk Broă lơh brê bơnơm sền gàr brê pơgồp bal mờ kwang àng càr geh broă rơndăp lơh lòt sền chồl bơtrồt tàm 17 kơnhoàl, ƀòn drà dờng, ƀòn dờng bè broă lơh rơcăng ồs sa crùh ồs sa. Ală mpồl cau tờm brê neh rơcăng lài lam lơh ală broă lơh rơcăng ồs sa crùh ồs sa bè pès chu lài geh bơta đơng pơlam nàng tơrmù uă ngan rlau jơh jơnau pơhìn ồs sa”.