Ală ngai do, ală Anih tờm drơng broă sră pơ àr gơnoar ătbồ dà lơgar tàm càr Lâm Đồng neh dờp gĭt nđờ jăt sră nggal mờ neh bơsong geh khà rlau 97%, ơm dơ̆ 7 jơh gùt lơgar bè bơsong sră nggal sră pơ àr gơnoar ătbồ. Nàng làng bol in  pơn  jăt tai geh bơsong sră nggal sră pơ àr di tơngai pơrgon, ƀươn ƀoài, Anih duh broă Làng bol càr Lâm Đồng neh bơyai lơh bơsram tàp, ai jơnau bơsram mờng chài ai rlau 5 rbô nă kwang bàng lơh broă tàm ală Anih tờm drơng broă sră pơ àr gơnoar ătbồ dà lơgar kâp sàh; bơsong mhar gơkòl sră nggal bè ù tiah tài bơh ờ tơl ƀăng kị; bơsong kal ke bè gùng jun, ală jơnau yal; lơh 3 Jơnum lơh broă bơh càr dê să tờm tơn lơh broă, dong kờl ală ƀòn lơgar tă bơsong kal ke, gơkòl, lam lơh di tŭ ală kơnòl broă tờm kwơmàng…

Ồng Hồ Văn Mười, Củ tịc Anih duh broă Làng bol càr Lâm Đồng pà gĭt, càr gam pơn jăt tai lơh niam broă lơh kwang bàng nàng mpồl lơh broă gơnoar ătbồ 2 kâp in lơh broă gơtùi mờ geh cồng nha:

“Ƀươn ƀoài dờng màng ngan là kwang bàng gĭt wă bè broă lơh broă gơnoar ătbồ 2 kâp bơh kâp càr mù tus kâp sàh, tiah is ồn loh làng ngan, geh kơnòl ngan den tàng sơrlèt jơh uă ngan kal ke. Bol hi tơngai tus pơn jăt tai bè broă lơh kwang bàng. Pơnyơu geh sơnah ƀòn geh 2, 3 nă oh mi là jak ngan bè jak chài măy mŏk mơya sơlơ̆u wơl geh sơnah ƀòn ờ geh. Geh sơnah ƀòn tŭ do kwang bàng sền gàr adăt boh lam ờ geh oh mi lơi halà geh mơya ờ jak, ờ hềt tŭ lơi lơh. Hơ̆ sồng ală broă mờng lơh bè ù tiah jăt tàm nùs hơ̆ rơ̆p rơndăp wơl kwang bàng gơ ndrờm bal 124 mpồl lơh broă sàh, sơnah ƀòn, tiah is ồn”.

Bal mờ rlau 5 rbô nă kwang bàng lơh broă tàm ală Anih tờm drơng broă sră pơ àr gơnoar ătbồ kâp sàh, càr Lâm Đồng gam hòi tơrgùm 1 rbô 200 nă đoàn viên ơruh pơnu tus 124 mpồl lơh broă sră pơ àr gơnoar ătbồ sàh, sơnah ƀòn, tiah is ồn tàm ù tiah càr dê nàng dong kờl gơnoar ătbồ kâp hơđơm lơh jăt kơnòl broă sră pơ àr gơnoar ătbồ mờ tam gơl sồ. Ơruh pơnu geh nùs nhơm lơh broă dong kờl is pơlam làng bol lĭp sồ jăt rơndăp tăp sèng, crăp tơmŭt sơnđan măt tàm internet, lơh măt làng bol tàm internet…Mơkung bơto pơlam, mblàng đơs loh mờ dong kờl ală jơnau yal kờñ pal geh bè ală sră nggal sră pơ àr gơnoar ătbồ, drơng broă ala dà lơgar tàm internet.

Jăt ồng Bùi Quốc Huân, Củ tịc Anih duh broă Làng bol sàh Lạc Dương, càr Lâm Đồng, do là broă lơh geh kwơ ngan, pơgồp bơnah dong kờl lơh broă ală Anih tờm drơng broă sră pơ àr gơnoar ătbồ dà lơgar geh lơh broă ƀươn ƀoài, tơrmù uă ngan tŭ jiơ tàm ală tŭ dờp mờ bơsong sră nggal, ngan là gơ wèt mờ ală ƀòn tiah sar tiah ngài, tiah làng bol jơi bơtiàn dồ êt nă cau gam ờ hềt jak chài tàm ngui măy mŏk sồ tàm điện thoại smarphone. Ồng Bùi Quốc Huân, pà gĭt: “Tŭ làng bol tus lơh ală sră nggal, tàm ală tŭ lơh tàm anih lơh broă internet ờ hềt mờng den geh mpồl ơruh pơnu do dong kờl. Añ kung neh sồr mpồl kwang àng sàh pơgồp bal dong kờl làng bol niam ngan rlau jơh, cau lơi ờ hềt pờ VneID den pơlam khi in. Bal mờ hơ̆ lùp sền wơl nền khà làng bol ngui điện thoại smarphone hơ̆ là điện thoại ngăc ngar nàng bơh hơ̆ geh jơnau dan ală broă lơh. Kwơmàng ngan là tŭ geh làng bol tus dan pà drơng broă dà lơgar den bol hi ndrờm dong kờl gơtùi geh ai 100%”.