Broă lơh sền gròi ngan rlau jơh tàm ală ngai do là Dơ̆ tơngkah kir sơnrai 50 nam Ngai Tơngklàs tiah đah Jum, tơrgùm dùl Dà lơgar tàm ngai 30/04 tàm ƀòn dờng Hồ Chí Minh. Dơ̆ tơngkah kir sơnrai yŭ rơyùm mờ dờng màng ngan mờ broă lơh dờng, mờ bơta tus bal bơh gĭt nđờ jơ̆t rơbô nă làng bol mờ năc lòt nhơl ală lơgar.

Dơ̆ tơngkah kir sơnrai 50 nam Ngai tơrgùm dùl Dà lơgar geh 48 mpồl ling, mờ pơgăp 13 rơbô nă cau tus bal ling lòt pơdar lik lòt tàm gùng. Mpồl ling klàng lơgar Lo, Lào mờ Campuchia tus bal ling lòt pơdar lik lòt tàm gùng di dơ̆ do. Tàm dơ̆ tơngkah kir sơnrai, mpồl ling klàng neh cuh 21 ròt đại ƀák tàm gùng đơs crih Quốc Ca Việt Nam. Ƀiñ củng rcang gàr lài tềng hơđang kơl wàng trồ- Ling rơndeh par hòi jà tơrgùm bal gĭt nđờ jơ̆t nơm rơndeh măi duck, rơndeh par tam lơh ràng tơlik tềng hơđang kơl wàng trồ.

 Tàm ƀòn dờng Hồ Chí Minh neh bơyai lơh git nđờ jơ̆t anih cuh phăo bơkào drơng làng bol in tàm ngai chjờ dà lơgar dê. Mang ngai 30 nhai 4, cuh phăo bơkào uă ngan bơh lài tus tŭ do mờ 28 anih cuh lơyah mờ 2 anih cuh ñhoa tàm gùt ƀòn dờng.

Bal mờ hơ̆, ală broă lơh ai tơngŏ bơta àng gơcrà tàm kơl wàng trồ tàm ală mang ngai 26 nhai 4 mờ mang ngai 30 nhai 4 mờ rơlao 10 rơbô nơm bơta phan par ờ geh cau măi, ai tơngŏ uă rùp rài geh tơngu me krơi is ngan bè ƀòn dờng Hồ Chí Minh dê tàm 50 nam do.

Mờ tàm ƀòn dờng Hồ Chí Minh kung geh bơyai lơh dùl ròt ală broă lơh ràng tơlik đơs crih tam ya niam ngan. Hơ̆ là gah sơñio rùp kấp Dà lơgar “Mpong ntas sùm jơnau đơs crih chờ hờp”. Broă lơh đơs crih tam ya is ồn do bơh Ƀộ Niam chài, Tàp pràn să jan mờ Lòt nhơl đơng lam, pơgồp bal mờ ƀòn dờng Hồ Chí Minh bơyai lơh tàm gơlang Thống Nhất ngai 29 nhai 4.

Ràng tơlik gùng đơs crih tam ya kơ wào pơgồp bal mờ ală bơta chài tàm ơseh bơh Ƀộ Kwang àng dê đơng lam, geh bơyai lơh tàm tiah gùng lê Lợi mờ gùng drà lòt jơng Nguyễn Huệ.

Tàm Hà Nội, Broă đơs crih tamya tờm “Pơrgon Đah Tô – Đah Jum” neh bơyai lơh tàm ƀlàng coh plai Mỹ Đình, mờ broă tus bal bơh rơlao 800 nă cau đơs crih, cau lơh bal mờ ală cau ling yau, cau lơh cơng tàm rài tam lơh lài do. Broă lơh là bơta pơgồp bal đah bơta rài lài do, yal tơngit mìng dùl tơngu me, lơh geh wơl gùng đơs crih bal mờ jơnau đơs crih pa. Is ồn ngan tàm broă lơh do geh bơta tơlik bơh 2 nơm rơndeh sơtăng T54, do là bơta rơndeh sơtăng geh ngui tàm rài tam lơh mờ ling lơgar Mỹ sò tơm.

Pơrgon Đah Tô – Đah Jum, geh jơnang đơs crih dờng niam, tàm hơ̆ geh bal bàr mpồl bơrlŭ bal ai tơngŏ 2 tiah Đah Tô mờ Đah Jum, tàm gùl geh rơbàng Hiền Lương. Bal mờ hơ̆ là phan sòl 3D mapping dơ̆ sơnrờp geh tàm ală broă lơh đơs crih tamya dê.

Lài hơ̆, tàm Hìu pơrjum Thống Nhất (tiah tềl lời wơl Dà lơgar is ồn Gơlang Độc Lập) geh bơyai lơh broă lơh đơs crih tam ya “Dà lơgar wil tơl bơta chờ hờp”. Broă lơh geh 3 dơ̆: “Bơta kơ̆p kờñ ngan tơrgùm dùl”, “Bơta kơ̆p kờñ ngan brồ guh” mờ “Kơ̆p kờñ dờng pràn”, geh bơt bơtàu cèng bơta đơs crih tam ya, geh bơta bơta đơs crih, tam ya, gùng đơs crih, mpràp, lơh lèo, jơnau yal yau....

Neh lơh tơngŏ wơl ală tơngai kah yau dờng màng pơn yờ să bơh jơi bơtiàn, Dà lơgar mờ đơs nền gơnoar dờng màng bơh Tam lơh pha lin dờng kàl prang nam pa 1975.

Tàm Hà Nội, Anih jơnau đơs Việt Nam bơyai lơh broă lơh gùng đơs crih tờm kwơ màng “Jơnau đơs crih pha lin rê tàm bơta chờ”. Broă đơs crih do geh boyai lơh 3 bơnah: “Hà Nội kơno jơnau pha lin”; “Rê tus Sài Gòn”; “Dà lơgar tơnơ̆ tơrgùm dùl”. Tơl bơnah là dùl broă lơh ngoh rơngăc ngan, lơh geh wơl ală tŭ pràn kơl dang, bơh dơ̆ kah wơl rài lài do tus mờ bơta mùl màl bơh dùl lơgar Việt Nam tam gơl pa, tơrgùm bal mờ bơtàu tơnguh.

Ồng Ngô Thiệu Phong, Lam bồ dờng Ƀăi điện tử Anih jơnau đơs Việt Nam yal: “Tàm broă lơh “Jơnau đơs crih pha lin rê tàm bơta chờ”, bol añ kờñ lơh kis wơl nùs nhơn ngai 30 nhai 4 nam 1975 tàm Anih jơnau đơs Việt Nam dê. Is ồn là tàm anih kŭp jơnau đơs Anih jơnau đơs Việt Nam dê, ală cau neh sền jơnau tơngit pha lin ngai 30 nhai 4 nam 1975. Ală cau geh ală jơnau tơngit sơnrờp ngan, ală cau pơnyờ să geh ai jơnau tơngit bơh să tờm dê nàng ală cau, làng bol gùt lơgar bal mờ jơh gùt dunia in iăt, yal dùl broă lơh dờng ngan bơh dà lơgar dê là “Việt Nam neh mùl màl tơrgùm dùl”.