Drim òr (21/07), tàm Hà Nội, Anih duh broă Mặt trận Dà lơgar Việt Nam ƀòn dờng Hà Nội bơyai lơh tìp măt, ưn ngài cau ling yau, cau ling sồt să pơnrơ jăk mờ cau tàm mpồl geh rài kis gơtìp kal ke di tơnkah 79 nam Ngai Cau ling sồt să - Chơ̆t màng (27/7).

Tus bal dơ̆ pơrjum geh Phó Bí thư Thành ủy ƀòn dờng Hà Nội ồng Nguyễn Văn Phong bal mờ ală cau mè Việt Nam khin cha jăk chài mờ 130 nă cau ling yau cau ling sồt să pơnrơ jăk. Là tiah geh khà hìu nhă geh sră dong kờl gal ngan bơh gùt lơgar dê mờ rơlao 800 rơbô nă, ƀòn dờng Hà Nội sùm sền broă “Kis git jơnau git adăt” là kơnòl broă chính trị tờm mờ kơnòl broă kwơ màng ngan. Nam 2025, Ƀòn dờng Hà Nội neh lam Kes priă “Kis git jơnau git adăt” geh rơlao 26 tơmàn đong, pà git ndrờ rơhiang pò phan, lơh niam wơl uă broă lơh dờp mờ dong kờl lơh niam wơl hìu ơm ai ală cau geh sră dong kờl bơh mpồl bơtiàn in. Di tàm dơ̆ tơnkah nam do, kwang đơng lam Ƀòn dờng Hà Nội pơn jăt tai bơyai lơh còp să, jào pà rơlao 114 rơb6 500 pò phan mờ kờp jơh khà priă rơlao 273 tơmàn đong, ai tơngŏ nùs nhơm git ưn ngài uă ngan gơwèt mờ ală cau geh màng mờ dà lơgar dê.