Hìu bơsram ơm sa bic tơn bàr kấp Kấp 1 mờ Kấp 2 Buôn Đôn ur ar rơcang ai nam bơsram sơnrờp ngan tàm hìu bơsram pa. Ală ròt ơdŭ bơsram, tiah hìu ơm bal, hìu sa, hìu tàp pràn să jan uă bơta, ƀlàng coh plai mini… neh rơcang lài wă kơnòm bơsram. Gơwèt mờ oh H’ Sinh Nhị Kbuôr, bơsram ơdŭ 8, bơta chờ dờng ngan là bơh tŭ do oh gơtùi bơsram tàm dùl hìu bơsram ơm sa bic tơn tàm ƀòn lơgar tờm. Lài do, oh kung neh geh dơ̆ kơ̆p kờñ mŭt tàm Hìu bơsram Jơi bơtiàn ơm sa bic tơn càr Dăk Lăk tàm sơnah ƀòn Buôn Ma Thuột, mơya gùng lòt ngài rơlao 60 kơi sồ bal mờ bơta geh bơh hìu nhă dê gơtìp kal ke den tàng jơnau kơ̆p kờñ hơ̆ ờ hềt geh mùl màl.

Tŭ do, hìu bơsram pa neh geh ai bơta niam bơsram sră hơ̆ tus rềp mờ hìu rơlao gơwèt mờ oh H’ Sinh Nhị dê: “Nam bơsram pa do, oh mŭt bơsram tàm hìu bơsram ơm sa bic tơn bàr kấp, geh hìu ơm bal dờng niam, kloh niam, tơl phan ngui mờ măi mrềt, phan puh càl. Oh kis tàm do iang nùs ngan. Bơdìh hơ̆ tai, ală jơdŭ bơsram tờm kung geh tơl phan rơlao uă ngan di lah pơn drờm mờ hìu bơsram lài do. Oh rơ̆p lơh ngan bơsram jăk, lơh ngan lơh gơs jơnau kơ̆p kờñ gơs cau ùr Kwang àng Làng bol dê”.

Gơwèt mờ oh Buôn Si Sa Núc Lào, kòn cau Lào, tàm ƀòn Trí, sàh Buôn Đôn, nam do oh guh ơdŭ 6, Hìu bơsram Ơm sa bic tơn kấp 1 mờ kấp 2 Buôn Đôn dê, do là hìu bơsram pa kung pờ geh dùl tiah bơsram sră ƀuơn rơlao, mờ ai geh bota niam nàng oh in tàp pràn să jan mờ kờñ lơh jăt jơnau kờñ gơboh. “Hìu bơsram pa oh mŭt bơsram geh Hìu tàp pràn să jan uă bơta, geh ƀlàng coh plai den tàng bơsram tàp pràn să jan niam ngan. Bol oh ờ di pal bơsram hờ bơdìh ù tiah trồ tơngai duh bè lài do tai. Pah mho, oh gơtùi coh plai mờ ală bơyô dê mờ ờ pal ngòt gơpừ jê bè tàm ƀlàng ù rềp tềng hìu. Oh lơh ngan tơriang bơsram sră. Oh kờñ gơs cau chài coh plai mờ rơ̆p lơh ngan nàng lơh jăt jơnau kơ̆p kờñ do”.

Ală tam gơl hơ̆ geh kwơ màng ngan tàm Buôn Đôn dê, do là dù1 tàm 4 sàh tiah nhàr lơgar tàm ù gờl càr Dăk Lăk dê. Sàh geh mờr 6 rơbô 700 nă làng bol, khà làng bol jơi bơtiàn ờ gal cau geh rơlao 75%. Nam bơsram 2026-2027, Hìu bơsram Ơm sa bic tơn Kấp 1 mờ Kấp 2 Buôn Đôn geh 1 rơbô 138 nă kơnòm bơsram bơh ơdŭ 1 tus ơdŭ 9. Jơh ală kơnòm bơsram bơsram tàm hìu bơsram mờ dờp geh ală broă dong kờl jăt mờ jơnau geh ai bè sră măi, sào sa, ơm bic, phan soh, ồi tơ̆, kơƀuờng, bềl dă.

Hìu bơsram lơh jăt broă lơh sră măi bơto bàr kấp mờ wèt tus bơtàu tơnguh bơta niam nùs nhơm, bơta pràn kơnòm bơsram dê. Gơwèt mờ kơnòm bơsram jơi bơtiàn ờ gal cau tàm dùl sàh gam uă kal ke, jơnau kờñ do ờ mìng là tơnguh khà geh mờ gam dong kờl ală kơnòm bơsram geh tai jơnau git wă, nùs nhơm pin dờn mờ bơta pràn gơdờp mờ tiah bơsram sră pa dê.

Jăt mờ Phạm Thị Loan, Phó Kwang lam bồ hìu bơsram pà git, do là nam bơsram sơnrờp ngan lơh broă, hìu bơsram rơcang lài nền nòn bơh phan bơna tus mờ bơ̆t bơtàu broă bơto bơsram mờ atbồ kơnòm bơsram gơdờp mờ broă ơm sa bic tơn bàr kấp dê. “Gàr niam broă bơto mờ bơsram geh cồng nha uă, hìu bơsram neh rơcang lài ndrờm bal jơh ală broă lơh đah ală kấp bơsram dê nàng pơgồp bal nền nòn đah bơsram sră mờ bơsram tàp kơnòm bơsram dê. Bè broă bơyai lơh ơm sa ngai, ơm sa bic tơn, hìu bơsram kung neh lơh gờñ tơn bơh bồ nam bơsram nàng ală cau pơgru, cau lơh broă in git broă rơndăp lơh, tŭ lơi kung rơcang lài nùs nhơm atbồ kơnòm bơsram ơm sa ngai, ơm sa bic tơn in”.

Phan bơna pa, broă bơto bơsram pa kung geh ai jơnau kờñ pa gơwèt mờ mpồl cau pơgru dê. Mờr 60 nă cau pơgru tàm hìu bơsram neh tus bal ală ơdŭ bơsram bè broă bơto kấp bơsram nam 2018, mờ lơh kèng mờ ală mpồl phan pa geh blơi ai ală ơdŭ bơsram in. Gơwèt mờ pơgru Phan Thúy Hằng, bơto dà Mỹ đơs, rùp cảm ứng mờ ală phan dong kờl ờ mìng lơh ơdŭ bơsram in niam rơlao mờ gam pờ geh tai broă rơcang jơnau bơto in. “Bơto dà Mỹ tàm jơdŭ bơsram pa geh rùp cảm ứng mờ măi mrềt, do là bơta ƀuơn nàng añ ngui măi mok, bơyai lơh ală broă lơh iăt-đơs, nhơl mờ boh bơr niam bơnĕ rơlao, dong kờl kơnòm bơsram in geh bơta niam, chờ hờp mờ gơboh rơlao tàm broă bơsram. Añ kung git là do là dơ̆ niam, kơnòl broă nàng să tờm tam gơl pa gùng dà broă bơto, lơh geh cồng nha ală phan ngui bơto nàng tơnguh uă bơta niam broă bơto môn dà Mỹ đơs is, ală ôn bơsram ndai đơs bal”.

Mờ broă sền gròi bơh Đảng, Dà lơgar, bơh nam bơsram pa, rơlao 1 rơbô 100 nă kơnòm bơsram tàm sàh tiah nhàr lơgar Buôn Đôn, càr Dăk Lăk geh bơsram sră, sào sa, ơm bic mờ kis tàm hìu bơsram dờng niam, lơh pa. Ờ mìng tơnguh uă bơta niam bơsram sră, hìu bơsram gam là “hìu ơm bal”, anih ròng nùs nhơm kơ̆p kờñ, bơsram tàp mờ lòt bal nàng kơnòm bơsram tàm tiah nhàr lơgar pin dờn, gơs dờng pràn, rài tơnơ̆ do tus pơgồp bal tàm broă bơ̆t bơtàu ƀòn lơgar, sền gàr tiah nhàr dà lơgar in.