Ală ngai do, tàm Tiah drà Ân Phú, sơnah ƀòn Tân Lợi, ƀòn dờng Buôn Ma Thuột, gĭt nđờ jơ̆t nă cau lòt lơh broă blơi mờ tăc, lơh giă ù gơguh jat pah ngai. Bàr nhai lài, dùl bơnah ù ơnàng 100 thơk vuông tàm do geh giă tăc pơgăp 2 tơmàn đong, den tŭ do gơguh tus 2 tơmàn 500 tơlak đong. Ờ mìng ù tàm ală tiah drà gơguh pràn, mờ ù gời tàm uă sơnah ƀòn, sàh mờ tiah rềp bal ƀòn dờng Buôn Ma Thuột kung cih dờp khà gơguh pơgăp 20%.

Mò Phạm Thị Thanh, ơm tàm sơnah ƀòn Đạt Hiếu, ƀòn drà dờng Buôn Hồ, càr Dăk Lăk, pà gĭt: kòn klau mờ kòn ƀăn mò gam lơh broă tàm ală anih lơh broă Dà lơgar tàm càr Phú Yên. Dilah 2 càr tơmŭt bal, ală kòn uă bơta pal ntrờn rê tàm Ƀuôn Ma Thuột lơh broă mờ ơm kis. Den tàng hìu bơnhă mò Thanh gơ jal ngan blơi ù nàng rcang lơh hìu. Mò Thanh đơs:“Kơno gùt dar đơs là tơmŭt bal càr pơgăp mờ do 2 nhai rao den añ lòt tus Tiah drà Ân Phú lùp bơnah ù 100 thơk vuông den khi dan 2 tơmàn đong, añ kwi kwơ den ờ blơi. Mơya tŭ do kơno ngan ngồn Dăk Lăk tơmŭt bal mờ càr Phú Yên den añ lùp wơl, khi dan 2 tơmàn 600 tơlak đong. Giă gơguh uă ir, mơya nùs nhơm kwang bàng tàm Phú Yên kờñ geh tiah ơm kis lơngăp lơngai den pal blơi ai ală sau in lơh hìu. Ngan là añ rơ̆p pơn đơl pràn blơi, di ờ là giă ù pơn jat tai gơguh”. 

Ồng Phan Thái Bình, Kwang atbồ dùl Kông ty ù tiah hìu đam tàm Buôn Ma Thuột pà gĭt, mờ 100 nă cau lơh broă kă bro, kờp bal pah ngai kông ty lơh broă geh cồng nha pơgăp 20 sră pơrgon blơi- tăc ù tiah hìu đam. Pơndrờm mờ tơngai gơmù tàm lồi nam 2022, den do là khà lơh broă niam ngan. Ồng Phan Thái Bình, đơs: “Sền bal, drà kă bro ù tiah hìu đam tàm càr Dăk Lăk gam geh uă gùng dà bơtàu tơnguh wơl uă ngan pơndrờm mờ lài do. Jơnau kờñ ngan ngồn gơguh, dùl bơnah tài bơh broă lời tĕ kấp kơnhoàl, kwang bàng geh ntrờn rê tàm sàh, bàr pe nă cau ndai den ntrờn tus Buôn Ma Thuột lơh broă. Bơdìh mờ hơ̆, uă cau dờng sơnam rê rlô lơh broă kung kờñ rê tàm Buôn Ma Thuột ơm kis sơl. Bơdìh hơ̆, tơnơ̆ jơnau yal tơmŭt bal càr, lài do neh geh năc bơh Dăk Nông tus blơi, tŭ do pơn jat tai geh tai năc bơh Phú Yên tai. Khi ndrờm là ală cau geh jơnau kờñ blơi ngan mờ ơm ngan”.

Tơrgùm kờp bơh Cơldŭ lơh broă Dan lơh sră ù tiah- Sờh Broă lơh sa suơn sre mờ Tiah ơm kis càr Dăk Lăk pà gĭt, tàm qúy 1 nam 2025, ală anih lơh broă gơwèt mpồl lơh broă dê neh dờp mờ bơsong mờr 75 rơbô sră nggal gơrềng tus sră nggal ù tiah, gơguh rlau 17% pơndrờm dùl tŭ bal mờ nam lài.

Ồng Hoàng Xuân Phương, Phó Kwang atbồ kong kơnòl Cơldŭ lơh broă Dan lơh sră ù tiah đơs, khà sră nggal gơguh nisơna neh lơh uă tŭ tàm ală mpồl lơh  broă dùl mpồng tàm ƀòn dờng Buôn Ma Thuột mờ kơnhoàl Cư M’gar gơ ơm tàm bơta uă ir: “Cơldŭ lơh broă Dan lơh sră ù tiah neh sồr ală anih lơh broă lơh tai tiah dờp sră nggal mờ tơn jŏ tơngai dờp nàng kờñ dong kờl làng bol, pleh nàng khi in pal kơ̆p jŏ ir. Bơdìh hơ̆, bơh ngai 1/04, bol añ lam lơh broă lơh tàm internet tàm broă bơsong sră nggal gơnoar atbồ đah anih lơh broă dia mờ cơldŭ lơh broă tăp băng kì, dong lơh jat ală broă lơh online. Bơh sơn rờp, broă lơh do cèng wơl cồng nha niam, khà bơsong sră nggal uă”.

 Drà ù tiah hìu đam gơguh pràn tàm Buôn Ma Thuột ală ngai do là bơta gơlik geh ờ gơtùi pleh klàs bơh drà kă bro dê tềng đăp jơnau yal tơmŭt bal càr, tŭ tiah do geh rơwah là anih tờm sră nggal gơnoar atbồ bơh càr Dăk Lăk pa dê. Bal mờ khà uă ngan kwang bàng, kông cứk ntrờn rê tàm anih tờm, Buôn Ma Thuột, mờ gơnoar broă pa rơ̆p gơ hòi gơ jà ngai sơlơ gal ngan ală hìu bơnhă, mpồl cau mờ mpồl lơh sa kă bro.