Rơndăp broă lơh gùng ù gờl rơndeh lòt mhar Quy Nhơn – Pleiku jòng di pơgăp 125 kơi sồ, lòt gan 16 sàh, sơnah ƀòn; geh lơh ơnàng 4 gah rơndeh lòt, bơta kờl 100 kơi sồ tàm 1 jơ, mờ priă bơcri mờr 44 rơbô tơmàn đong. Do là broă lơh geh gơnoar atbồ bal mờ làng bol càr Gia Lai kơ̆p gơn rơ̆p lơh geh bơta pràn tơrbŏ gùng lòt, lơh pràn broă kă bro mờ bơtàu tơnguh lơh sa mpồl bơtiàn càr dê.

Kơnờm mờ bơta kwơ do, broă lơh rơndăp broă lơh gùng do dờp geh jơnau ring bal uă bơh làng bol tàm tiah gơrềng bal dê. Uă hìu làng bol geh ù gơwèt tàm mpồl toh ù neh rơcang pơgồp bal, gờñ jào ù nàng rơndăp broă lơh gùng geh lơh ƀuơn. Gơnoar atbồ ală sàh, sơnah ƀòn tiah geh rơndăp broă lơh gùng rơndeh lòt mhar Quy Nhơn – Pleiku lòt gan gam lơh ngan tàm broă tơm ntrờn ù tiah nàng gờñ jào ù ai mpồl lơh gùng in. Nàng lơh Rơndăp broă lơh gùng ù gờl rơndeh lòt mhar Quy Nhơn – Pleiku pal tơm ntrờn rơlao 942 lồ ù, mờ priă tăc tàm broă tơm ntrờn, dong kờl kờp dŭ rơlao 4 rơbô 700 tơmàn đong.