Tàm trồ tơngai duh tơr ồl bơh nhai 7 tàm ù tiah Đồng Xuân, tiah đah mat tơngai lik càr Dăk Lăk, mờr 30 nă kwang bàng, cau ling Gah đơng lam Ling klàng càr, mpồl ling klàng bal mờ ală ƀák sìh pháp y kung gam ngềt ngơ̆t kềng gah ală bơtô ƀồc cau ling chơ̆t màng ờ hềt gĭt muh mat tàm Ƀlàng tơ̆p ƀồc Cau ling chơ̆t màng Xuân Quang 2. Dùl tŭ tơngai bal, dùl mpồl lơh broă ndai lam lơh tơrgùm mẫu sinh phẩm tàm Ƀlàng tơ̆p ƀồc Cau ling chơ̆t màng La Hai. Tơl bơtô ƀồc ndrờm geh pờ mờ jơh bal mờ bơta ki ngàm, jơh nùs sền dờng màng, tài bơh cau lơi kung wă là, mìng dùl mẫu ADN gam prap lời wơl kung gơ tùi pờ geh tŭ tơngai niam jun dùl nă cau kòn bơh Dà lơgar dê rê wơl mờ hìu bơnhă tơnơ̆ uă nam.

Gơwèt mờ Trung tá Lê Nam Ninh, Dong broă Mpồl Gùng dà broă lơh, Cơldŭ lơh broă Chính trị, Gah đơng lam Ling klàng càr Dăk Lăk, dơ̆ lòt lơh broă dơ̆ do cèng gơtha is ồn ngan. Kềng gah uă kơnòl broă geh jàu, bi gam cèng jat bal bơta kơ̆p kờñ uă nam bơh hìu bơnhă dê, jòi wơl bơtô ƀồc ồng đah mè neh chơ̆t phi să tàm rài tam lơh, kung là bơta kơ̆p kờñ ndŭt ndơl bơh mè ồng dê. Trung tá Lê Nam Ninh đơs: "Oh mi tàm mpồl bơsram lơh jat bal, pơrjum tàm jàu kơnòl broă ai tơl nă cau tàm mpồl in nàng lơh jat nùs nhơm geh kơnòl. Lơh jơh kơnòl bơta nđàc hơ̆ sồng wil tơl. Să tờm añ, tàm tŭ lơh broă lơh do kung kơ̆p kờñ jòi gŏ ồng đah mè bơh añ dê sơl”.

Tŭ do, tàm 34 ƀlàng tơ̆p ƀồc cau ling chơ̆t màng tàm ù tiah càr Dăk Lăk dê, kung gam rlau 4 rơbô 100 bơtô ƀồc ờ hềt sền gĭt muh mat. Ndrờm mờ hơ̆ là gĭt nđờ rơbô hìu bơnhă kung gam kơ̆p ngan dùl ngai ne gĭt gŏ tiah ơm bĭc rlô bơh cau pròc mhàm dê. Ngan là bơh bơta kơ̆p gơn hơ̆ neh ai geh tai bơta gơn kơnờm nàng kwang bàng, cau ling mờ mpồl lơh broă ờs mờng in jơh nùs lơh broă, bulah trồ tơngai duh tơr ồl halà ngai rlô.

Mơya, gùng lòt jòi wơl mat ai ală bi in ờ gŏ di tŭ lơi kung ƀuơn lơm ờ. Tơnơ̆ gĭt nđờ jơ̆t nam, uă bơtô ƀồc kung mìng gam bràs ù, tềl lời wơl ƀồc ntìng gơ lơh bè ờ gam tai den tàng ờ gơtùi ai geh mẫu sinh phẩm nàng drơng broă sền gĭt ADN.

Tàm Ƀlàng tơ̆p ƀồc Cau ling chơ̆t màng La Hai, mpồl lơh broă tờ geh 27 bơtô ƀồc mơya mìng geh 6 bơtô ƀồc tơl ală bơta nàng ai mẫu, gam 21 bơtô ƀồc ờ tơl ală bơta nàng tơrgùm sinh phẩm. Bơta hơ̆ kung ndrờm bal mờ broă kung gam uă cau ling chơ̆t màng ờ hềt gĭt muh mat.

Bák sìh Hồ Kim Thi, lơh broă Anih tờm Pháp y, càr Dăk Lăk pà gĭt, nàng tơl mẫu ntìng cau ling chơ̆t màng dê geh gàr niam bơta kwơ jat sền ADN, tơl broă lơh ndrờm geh lơh jat kràñ ngan. "Tàm broă bơsong mẫu nền nòn uă ngan, ờ gŏ di lơh tàm bơtờp bal să tờm cau bơsong dê, ờ gŏ di lời tàm bơtờp ai mẫu hơ̆ in. Tài bơh, broă ai mẫu neh kal ke rao den tàng pal kơrhia ngan. Kơ̆p kờñ jòi gŏ wơl muh mat ai ală cau ling chơ̆t màng neh chơ̆t phi să in”.

Gah đơng lam Ling klàng càr Dăk Lăk neh lơh sir broă ai mẫu sinh phẩm tàm Ƀlàng tơ̆p ƀồc Cau ling chơ̆t màng La Hai. Tŭ do mpồl lơh broă lam lơh bal 2 mpồl lơh broă tàm Ƀlàng tơ̆p ƀồc Cau ling chơ̆t màng Xuân Sơn Nam mờ Ƀlàng tơ̆p ƀồc Cau ling chơ̆t màng Xuân Phước, sàh Đồng Xuân.

Tus tŭ do, mpồl lơh broă lơh neh tờ 280 tàm kờp jơh 4 rơbô 019 bơtô ƀồc cau ling chơ̆t màng; tơrgùm geh 105 mẫu ƀồc ntìng tơl ală bơta sền gĭt ADN, gam wơl 175 bơtô ƀồc cau ling chơ̆t màng ờ tơl ală bơta ai mẫu.

Ndrờm bal mờ hơ̆, Mpồl K51 pơgồp bal mờ ală tiah lòt sền, sền gĭt jơnau yal tàm 8 tàm kờp jơh 102 sàh; dờp 4 jơnau yal bè cau ling chơ̆t màng mờ bơtô ƀồc cau ling chơ̆t màng dê; tơrgùm geh 54 ƀồc ntìng cau ling chơ̆t màng, tŭ do ndrờm ờ hềt gĭt muh mat.

Jat broă rơndăp lơh, bơh tŭ do tus ngai 11/10/2026, broă tờ ƀồc, tơrgùm mẫu sinh phẩm tàm ală ƀlàng tơ̆p ƀồc gam wơl tàm ù tiah càr dê rơ̆p pơn jat tai geh lam lơh, pơn đơl pràn lơh ngan lơh sir broă lơh ai mẫu ADN lài mờ ngai 31/10/2026. Ồng Đào Mỹ, Phó Chủ tịch Anih duh broă Làng bol càr Dăk Lăk, pà gĭt: “Bol añ gam lơh pràn lam lơh broă lơh 500 ngai mang sền gĭt jơnau yal bơh cau ling chơ̆t màng dê. Bol añ gam kờp sền wơl broă rơndăp lơh nàng geh tŭ tơngai lơh broă jàu broă, tam pà broă lơh ngan ngồn, gàr niam jơnau kờñ là tus ngai 31 nhai 10 nam 2026 là pal lơh sir broă tờ bơtô bồc ai mẫu nàng sền gĭt. Mờ gam jơh nùs lơh pràn lòt jòi ƀồc ntìng cau ling chơ̆t màng tàm lơgar mờ kung gam jơh nùs geh gùng dà broă lơh nàng lơh pràn broă lòt jòi tàm lơgar Campuchia”.

Broă lơh 500 ngai mang ờ mìng là dơ̆ ntoăt pơrlòng mờ tŭ tơngai nàng prap lời wơl mẫu ADN gam jơngkah wơl lơm mờ gam là gùng lòt lơh jat nùs nhơm “Hùc dà kah tô dà”, kơnòl bơh rơnàng tŭ do dê gơwèt mờ cau neh chơ̆t phi să tài lơngăp lơngai is, khat gơboh bơh Dà lơgar dê. Tơl bơtô ƀồc geh pờ, tơl mẫu sinh phẩm geh tơrgùm ndrờm lơh geh tai bơta gơn kơnờm- bơta kơ̆p kơnờm rơ̆p geh tai ală cau ling chơ̆t màng geh hòi di mờ mat he dê, geh ƀòn lơgar tờm, geh hìu bơnhă, nàng tơnơ̆ gĭt nđờ nam nhai kơ̆p, ală bi ngan ngồn geh rê wơl tàm tê bơh ală cau pròc mhàm kờñ gơboh mờ tàm bơta kah ưn ngài wil tơl bơh Dà lơgar dê.