Dơ̆ hòi điện thoại jal mhar bơh sàh tiah ngài neh sơn đờm ai dùl dơ̆ lòt lơh broă kwơ màng ngan bơh Mpồl jòi tơrgùm ƀồc ntìng cau ling chơ̆t màng K51, gơwèt Gah Đơng lam Ling klàng càr Dăk Lăk dê. Tàm tơngai lik lơh broă uă “Broă lơh 500 ngai mang jòi rồ, tơrgùm ƀồc ntìng cau ling chơ̆t màng”, tơl jơnau yal bơh làng bol là dùl jơnau sồr ală cau ling lòt. Tiah tus dơ̆ do là dùl bă suơn tàm gùng jăt gah pôs ling kăc màng Dinh Điền – sàh Khuê Ngọc Điền lài do, tŭ do là sàh Krông Bông – do là tiah tam lơh lài do gơtìp uă ngan glar bòl.

Tơnơ̆ 3 kơi sồ gùng lòt tàm àr sre mờ mờr 1 kơi sồ lòt jơng guh kơh, ală cau ling tus tàm bă suơn kơphe tềng jơng bơnơm Chư Yang Sin. Nền nòn kwài tơl bơnai ù jăt tềl bơh làng bol yal, ală cau ling chờ hờp ngan tŭ tơl tăp toal tăng, tơl gơl che zu kơ̆t ƀào ƀồc cau ling neh ồm jăt mờ tơngai rơhời geh gŏ. Đại úy Nguyễn Duy Thuận, cau ling tàm mpồl K51 pà git: “Bol añ lơh nền nòn ngan, ai tê hơ̆ sồng ƀai lơh ù nàng lề, uă tŭ gŏ sề hơ̆ sồng ào neh jŏ ngan den tàng gơtìp ồm, di lah lời ờ tơl là tìs mờ ală wa ngan. Oh mi jòi gŏ bè do là he chờ hờp ngan”.

Tam lơh neh jŏ rơlao, mơya bơta moăt bal mờ kơnòl mờ ală cau neh chơ̆t phi să den ờ hềt tŭ lơi jơh. Gơwèt mờ Đại úy Y Nhai Drao, do là cau neh geh mờr 20 nam lơh broă jòi rồ tơrgùm ƀồc ntìng cau ling chơ̆t màng yal, pal dơ̆ tŭp di ntìng bơh ală cau ling chơ̆t màng là dùl dơ̆ lơh nùs nhơm ngoh rơngăc ngar mờ ờ gơtùi hòi gơs măt sơnđan. “Ngan là ƀồc ntìng cau ling chơ̆t màng, mpồl bol oh chờ hờp ngan, kung ndrờm mờ cau tàm hìu nhă tờm. Añ là oh kòn lơh kơnòl broă, là dùl bơnah tài jơnau sồr bơh plai nùs dê… Să tờm añ tŭ di bơnah ntìng bơh ală wa là ngoh rơngăc ngan ờ gơtùi đơs gơs jơnau, kờñ ñìm kung ờ gơtùi ñìm sơl, mìng git gơhòr dà măt mơ”.

Dơ̆ jòi rồ tơrgùm ƀồc ntìng cau ling chơ̆t màng tơn jơh tŭ măt tơngai neh tam toh tềng bồ. Cồng nha, mpồl lơh kơnòl broă neh rồ tơrgùm geh 2 ƀồc ntìng cau ling chơ̆t màng, bal mờ ală phan lời wơl bè toal tăng, ờ uă bơta phan bơh măi yal tơngit bal mờ phan ngui tàm rài kis să tờm neh ồm jăt mờ tơngai.

Kơl dung klơm ƀồc cau ling chơ̆t màng ndrờm geh ală cau ling lơh nền nòn ngan. Ồng Nguyễn Hoàng Quang, Phó Chủ tịch Anih duh broă Làng bol sàh Krông Bông đơs nền lơh ngan: “Do là tơngai lik lơh broă uă nàng lơh jăt broă lơh 500 ngai mang. Krông Bông là tiah pôs đồng kăc màng rài tam lơh lài do, tiah tam lơh lài do cui rơcai ngan. tàm tơngu me jơnau yal tơngit bơh làng bol dê bal mờ broă pơgồp bal bơh mpồl K51, bol añ rơ̆p pơn jăt tai lơh pràn broă mblàng yal, lơh bè lơi nàng geh cồng nha uă ngan nàng cèng rê muh măt, cèng ală ồng ală wa rê mờ ƀòn lơgar, rê mờ cau tàm mpồl ling bal”.

Nàng drơng tàm broă đal git măt, mpồl lơh broă geh gơnoar neh tơrgùm sề, ntìng drơng tàm broă đal git ADN. Tơnơ̆ mờ tŭ lơh gơs broă jòi rồ, bàr ƀồc ntìng cau ling chơ̆t màng bal mờ ală phan lời wơl geh cèng rê Ƀlàng tơ̆p ƀồc Cau ling chơ̆t màng Krông Bông. Broă tơrgùm geh cồng nha 2 ƀồc ntìng cau ling chơ̆t màng là cồng nha bơh broă pơgồp bal nền nòn đah mpồl ling mờ kấp ủy, gơnoar atbồ sàh, tàm hơ̆ uă ngan là ală jơnau yal kwơ màng geh làng bol yal. Tơl jơnau yal, bŭ lah dềt, ndrờm gơtùi gơs cơng tàng kwơ màng dong kờl nàng đal git tiah tơ̆p ƀồc cau ling chơ̆t màng, pơgồp bal tàm broă cèng ală bi rê mờ cau tàm mpồl ling bal mờ ƀòn lơgar dê.

Tŭ do Mpồl K51 pơn jăt tai rề ơnàng bă ù jòi sền tàm tiah bơnơm Đá Đen tàm tơngu me bơh ală jơnau yal làng bol dê, mờ broă lơh ngan jòi rồ, tơrgùm tơl ƀồc ntìng cau ling chơ̆t màng gam ơm wơl tàm tiah tam lơh lài do, pơgồp bal tàm broă lơh niam broă dong kờl ling klàng bal mờ nùs nhơm “Hùc dà kah tô dà”, “Kis git jơnau” bơh jơi bơtiàn dê.

Tơngai bơh Broă lơh 500 ngai mang jòi rồ ƀồc ntìng cau ling chơ̆t màng kung gam pơn jăt tai geh lơh. Hơ̆ sồng rơ̆p gam tai uă dơ̆ hòi điện thoại mpong săp tàm brê bơnơm dờng. Mờ tàm đah ne, ală cau ling tàm Mpồl K51 -–càr Dăk Lăk pơn jăt tai àñ săk lòt jòi. Tài gơwèt mờ ală cau ling do, hơ̆ ờ mìng là kơnòl broă, mờ gam là jơnau sồr bơh plai nùs dê.