Lồi nhai 04 nam 1975, dơ̆ tam lơh Hồ Chí Minh mŭt tàm tơngai lơh nền. Nàng ling lòt sơrbac mhar bè tus hờ Sài Gòn, mpồl Ling tơngklàs pal lòt gan ală pôs đồng ling klàng tờm ngan bơh gơnoar ătbồ Sài Gòn dê, tàm hơ̆ geh pôs đồng Đồng Dù, Củ Chi, dùl tiah geh ơn phàu dờng kơ̆ kơl jăp ngan bơh Sư đoàn 25 “Àng puh lèp tiah duh sùh iò” Mỹ dê lời wơl. Cau ling yau ồng Nguyễn Quang Luyến ơm tàm gùng Nguyễn Thị Định, sơnah ƀòn Thành Nhất, ƀòn dờng Buôn Ma Thuột, cau ling C17- Trung đoàn 48- Sư đoàn 320A, cau neh bal mờ Ling tơngklàs bơh dơ̆ tam lơh Tây Nguyên lòt tus hờ Sài Gòn ngoh rơngăc yal wơl: “Drim ngai 29/04 di jơnau sồr bơh anih ngài cuh tus, bol añ di 6 jiơ 10 phuk drim tŭ ñhŭ jơngo gơlik sơnđờm pờ gùng mŭt tus. Tŭ pờ gùng tus sò tơm den pal geh mpồng bơh 8 tus 9 thơk nàng rơndeh sơtăng he dê ơm bơh ngkời mŭt tus. Tŭ 2 nơm rơndeh sơtăng tus den dùl nơm gơkòl ờ gơtùi lòt tus, añ pal ùt gar phàu lơh is ùt jăt rơndeh sơtăng mŭt tàm pơng gàr dŭt ndơl, bulah chơ̆t kung pal mŭt tàm dơlam den ling tam lơh hơđăng ù gờl hơ̆ sồng lòt tus geh. Añ pìt dòm lì bĭc trŭp măt tàm ù, dùl gùng ñhŭ pràn is, ờ gĭt bơta lơi tai. Tŭ kah wơl den rơndeh sơtăng neh lòt nđăp he, gar phàu cuh ur ar gơlơh bè lòt lơh chờ. Tam lơh sơbơng roh ngan mờ gơlơh bè lòt lơh chờ, añ gŏ ờ hềt tŭ lơi gơlơh bè hơ̆”.

Tơnơ̆ tŭ lòt gan tiah rơcăng gàr Củ Chi- Đồng Dù, ală đah lòt sò tơm bơh ling tơngklàs dê sơrbăc mhar lòt tus dơlam ù tiah Sài Gòn. Klo ngai 30/04/1975, mpồl rơndeh sơtăng bơh Lữ đoàn 203, Ling mpồl 2 dê neh tus tơn hờ Gơlăng Độc Lập- tiah tờm đơng lam bơh gơnoar ătbồ Sài Gòn dê tŭ hơ̆. Rơndeh sơtăng lòt làm geh ƀàng sồ 843 bơh Lam bồ Mpồl ling dờng ồng Bùi Quang Thận đơng lam tơ wơl cồng phàu, jă ga, tơm tàm đah mpồng kiau. Tài bơh nisơna ir tìp bơta pràn kơryan dờng den tàng rơndeh chơ̆t măy. Rơndeh sơtăng geh ƀàng sồ 390 bơh Cau lam bồ cíñ trị ồng Vũ Đăng Toàn dê đơng lam lòt tơnơ̆ sơrlèt nđăp, mŭt tơm gơ pừ đah mpồng tờm bơh Gơlăng Độc Lập dê. 11 jiơ 30 phuk ngai 30/04/1975 bồng bi Tơngklàs gơ par tềng hơđăng rơkàng Gơlăng Độc Lập. Hơ̆ ngan là tŭ jiơ yal tơnggŏ Dơ̆ tam lơh Hồ Chí Minh kah yau neh jai pha jơh. Ồng Nguyễn Thanh Cảnh ơm tàm sơnah ƀòn Thành Nhất, ƀòn dờng Buôn Ma Thuột, ling geh griăt yal tơngĭt jơnau gơ wèt Anih lơh broă đơng lam kâp dờng Yal tơnggĭt jơnau gơ wèt Ling mpồl 2, dờp jơnau sồr yal tơngĭt jơnau dơ̆ tam lơh kah wơl: “Bol hi lòt tàm gùng uă lò srồng ngan, bol sò tơm tiăp cuh mơya bol hi sơrlèt jai jơh. Sơnđờm mŭt den đah kiau añ gŏ 1 nơm rơndeh sơtăng gơtìp gơkòl tềng hơ̆. Bè hơ̆ là rơndeh sơtăng 390 rŭc tơm song tơn đah mpồng mờ lòt sơrlèt tơn. Bi Thận tă bồng bi tềng rơndeh tơnơ̆ hơ̆ guh tus cờñ 2 yồng bồng bi tơngklàs. Tŭ hơ̆, Bùi Hữu Hạnh pa lam Dương Văn Minh lik. Dương Văn Minh đơs bol hi gơn nàng mŭt tàm jàu, den bi Thận đơs là ờ gŏ jàu dờp lơi jơh ờ, ală bi neh ờ jai rao, ală bi yal bơr pờ tê ờ jai. Tŭ hơ̆, bol hi cau lơi kung ñìm jơh, chờ hờp ngan, brờn ngan”.

Tàm dùl anih ngềt ngơ̆t ngan mơya kung kwơmàng ngan sơl, ồng Mai Văn Tiêm, tàm gùng Thủ Khoa Huân, ƀòn dờng Buôn Ma Thuột, lài do Lam bồ Anih yal tơngĭt jơnau măt ndơ̆p ndơr K26- Anih lơh broă đơng lam kâp dờng Ling mpồl 3, geh măt bal mờ mpồl đơng lam dơ̆ tam lơh, ngoh rơngăc yal: “Mpồl bol hi geh sền gàr kơrhia ngan tài bol hi jăt Đại tướng Văn Tiến Dũng. Ngai 30/04 añ pa ala dơ̆ lơh broă, añ pờ Anih yal tơnggĭt jơnau Sài Gòn iăt den kơno yal Dương Văn Minh yal bơr pờ tê ờ jai tam lơh, añ hơ̆ sồng yàl sơnđoh tài bơh chờ hờp ngan. Añ mìng kah là iăt jơnau “Añ Dương Văn Minh, Kwang ătbồ ing lơgar Việt Nam Kộng hoà yal bơr dan pờ tê ờ duh pal geh bơta lơi ling Tơngklàs tiah đah Jum Việt Nam”, añ hơ̆ sồng ngkề dờng: ơ oh mi, bol sò tơm pờ tê rao. Brờn ngan ờ gơtùi kơlôi tus geh, kơlôi tus là kờñ ñìm tơn, ngoh rơngăc ngan”.

Ală cau ling bè ồng Luyến, ồng Cảnh, ồng Tiêm…hơ̆ ngan là ală cau lơh cơng ngan ngồn ai jơnau đơs crih jờng rơ bơta khin cha jak chài Kàl prang nam 1975 in. Jơnau kah wơl bè ală dơ̆ tam lơh tàm pôs đồng 25- Đồng Dù, ală lơh nền sơrbăc mhar tàm Gơlăng Độc Lập, halà jơnau tô ri pờ yal tơngĭt jơnau yal bơr pờ tê ờ jai bơh Anih yal tơnggĭt jơnau Sài Gòn dê, kung gam kơno sùm tàm nùs nhơm ală cau ling nam yau dê- bè dùl jơnau tơngkah bè kơ̆p gơn ngan ring lơngai, lơngăp lơngai is.