Tàm tơngai tus còp, ồng Tập Cận Bình neh geh ală dơ̆ pơrjum bơyai mờ ală kwang đơng lam bồ dờng ngan bơh Đảng, Quốk hội, Cíñ phủ lơgar Việt Nam. Bàr gah ring bal pal kơ̆ nùs ai tơl bơta broă lơh lơh bơyô bal đah lơgar Việt Nam mờ lơgar Lo.

Bàr gah ring bal lơh jăt niam gơnoar broă bơh “Jơnau kĭ hơ tam klăc lơh broă bal lơh sa tơl làm tàm tiah do” (RCEP) mờ Jơnau kĭ hơ kă bro phan khăt gơboh đah ASEAN mờ lơgar Lo (ACFTA) lơh pràn kă bro phan đah bàr gah bơtàu tơnguh jăt gùng dà tàm pơnring bal. Sơlơ pơgồp bal đơng lam, pơgồp bal tàm dơlam ală mpồl uă gah, bè Liên hợp quốk, Anih cri bơyai Lơh broă bal Lơh sa câu Á – Thái Bình Dương (APEC), Pơrjum cri bơyai lơh broă bal câu Á mờ câu Âu (ASEM), Tơrgùm ală lơgar tàm tiah đah jum măt tơngai lik cau Á (ASEAN), tàm kờñ bal tàm broă tơnpồ mŭt tàm mpồl lơh broă ală lơgar. Bàr gah ring bal sền gròi mờ bơsong di pal jơnau ờ ring bal, prăp gàr bơta dờng niam git gơ̆p lơh bơyô bal đah lơgar Việt Nam mờ lơgar Lo. Tàm dơ̆ tus còp, bàr gah neh kĭ ală pang sră lơh broă bal tàm ală gah broă tơrbŏ gùng ù gờl, gùng rơndeh ồs, sền nàng git, kòp gơtờp tềng mpồng nhàr lơgar, kă bro phan geh lơh bơh broă lơh sa suơn sre, sền gàr dà lơgar, bơta chài măi mok pa, niam chài, tàp pràn să jan, bơto bơtê, rài kis broă lơh broă sa làng bol, bơta pràn cau lơh broă, yal tơngit jơnau mờ lơh broă bal ală tiah… Tổng Ƀí thư, Củ tịc lơgar Lo ồng Tập Cận Bình ưn ngài bè broă wă rò niam, đềt mềr mờ git gơ̆p lơh bơyô bal; jà Tổng Ƀí thư ồng Tô Lam bal mờ Củ tịc lơgar ồng Lương Cường gờñ tus còp lơgar Lo.