Tàm Hìu bơsram kâp 1 Nha Trang, 13 hìu bơsram geh rơndap gơ gơs dùl hìu bơsram, geh 1 hìu bơsram tờm, 12 hìu bơsram gơ wèt hìu bơsram mờ 5 sơnĕ hìu bơsram bal mờ rlau 10 rbô 500 nă kơnòm bơsram. Ală hìu bơsram gơ ơm rah rài bơh ală hìu bơsram tàm ù gờl tus ală sơnĕ hìu bơsram tàm ală bồt tàm yờn Nha Trang.

Mờ bơta dờng bè do, hìu bơsram neh sền nền wơl mpồl cau pơgru, cau lơh broă tàm gùt hìu bơsram, tàm ntrờn pơgru bơh tiah tơl tus tiah ờ tơl ngan là ală môn chuyên is ồn. Mò Châu Đình Mai Phương, Lam bồ Hìu bơsram kâp 1 Nha Trang pà git, broă rơndap tap sèng, tàm ntrờn dipal bơh sơn rờp pơgồp bơnah gàr bơta niam bơto bơtê mờ bơsram tàm hìu bơsram:

“Pơn yơu bè môn dà Mỹ, lài do tàm ală hìu bơsram gơ wèt hìu bơsram tờm, geh ală tiah kơnòm bơsram pal tă priă nàng bơsram. Mơya tơnơ̆ tŭ rơndap tap sèng wơl, pơgru jơngkah tàm tiah do rơp geh ai ntrờn tus tiah gam ờ tơl pơgru, nàng kơnòm bơsram in geh bơsram mờ ờ duh pal tă tai priă. Gơ wèt mờ môn Tin học kung bè hơ̆ sơl. Tơnơ̆ tŭ rơndap tap sèng wơl, pơgru Tin học geh tàm pơnring, tam pà rê hờ ală hìu bơsram”.

Broă atbồ hìu bơsram dờng, gơ wèt mờ uă hìu bơsram kung sồr gah bơto bơsram càr Khánh Hòa pal tam gơl broă lơh đơng lam broă. Lam bồ hìu bơsram tơrgùm tàm ală broă bal bè mờng chài lơh broă, mpồl cau pơgru, cau lơh broă mờ cồng nha, bơta niam bơto bơsram; ală broă gơ wèt hìu bơsram sơnĕ geh jàu cau drơng kơnòl in bơsong tơn. Hìu bơsram tơrmù ală dơ̆ pơrjum tơn ờ duh pal geh, sơlơ tàm cribơyai pờ tơlik tơn tàm internet tàm ală tiah jơngkah, ờ tơl uă, mờ kung lơh sir jơnau pal jat bè jàu kơnòl, tam pà kâp:

“Broă atbồ broă jat tàm măi mok yal jơnau tơnggit, jat tàm khà kờp, tàm jơnau pal jat, jơnau sồr bè jàu kơnòl, tam pà kâp. Tŭ tơmut bal, bơta geh dờp bơh ală hìu bơsram sơnĕ, hìu bơsram gơ wèt hìu bơsram tờm dê là ndrờm bal tàm bal dùl ù tiah sàh. Do là broă lơh niam ngan. Mè bèp kơnòm bơsram kung ring bal ngan sơl. Ala bè lài do pal rơ wah hìu bơsram, rơ wah ală hìu bơsram niam den tŭ do tàm sàh, bơta niam bơto bơsram mờ phan bơna geh gàr ndrờm bal rlau”.