Tàm dơ̆ tìp măt cri bơyai, ồng Trần Thanh Mẫn, Chủ tịch Quốc hội neh đơs nề lơgar Việt Nam sền kwơ bơta git gơ̆p lơh bơyô bal ờs mờng mờ lơh broă bal uă gah broă đah bàr lơgar dê, sền lơgar Panama là lơgar lơh broă bal tờm tàm tiah Mỹ Latinh dê.

Ồng Trần Thanh mẫn, Chủ tịch Quốc hội đơs nền, Quốc hội lơgar Việt Nam kờñ bal pràn kơl dang ală broă bơ̆t bơtàu broă lơh adăt boh lam ƀuơn nàng lơh ală jơnau ring bal đah bàr lơgar dê, lơh mùl màl jơh bơta pràn lơh broă bal gam dờng đah bàr lơgar dê. Bè broă lơh bal đah anih lơh adăt boh lam đah bàr lơgar dê, Kwang atbồ lơgar Panama ring bal kờñ broă lơh pràn tam gơl mpồl đah Quốc hội lơgar Panama mờ Quốc hội lơgar Việt Nam dê, tam gơl broă lơh mờng chài lơh adăt boh lam mờ lơh broă đah ală Anih duh broă, anih lơh adăt boh lam đah bàr lơgar dê; tơnguh rơlao tai gơnoar bơh anih lơh adăt boh lam tàm broă bơ̆t bơtàu adăt boh lam ƀuơn ai bơta git gơ̆p đah bàr lơgar in, kờñ bal tơrbŏ ală anih lơh broă Chính phủ - ală tiah -–mpồl lơh sa kă bro mờ dong kờl bơsong ală gơkòl, lơh pràn geh ală dơ̆ niam lơh broă bal mùl màl.