Dơ̆ lơh chờ sầu riêng Dăk Lăk nam 2026 geh bơyai lơh bơh ngai 15/8 tus ngai 02/9 mờ 18 broă lơh tờm mờ rlau 40 broă lơh lơh jat. Tàm tơngai do, càr Dăk Lăk gam wă mờr 750 rbô dơ̆ nac lòt nhơl, tàm hơ̆ rlau 275 rbô dơ̆ nac ơm wơl bic mang, kờp jơh priă lơh geh bơh lòt nhơl geh mờr 1 rbô 300 tơmàn đong.

Ồng Trần Quốc Toàn - Phó Kwang lam bồ Sờh Lơh sa mờ măi mok mờ Kă bro phan càr Dăk Lăk đơs là, dơ̆ lơh chờ neh lơh niam kơnòl broă tàm tơrbŏ bal - lơh broă bal gah lơh phan tŭ geh 9 sră nggal geh kĭ hơ gơ rềng tus anih lơh mrềt, logistics, lơh gơlik jrô mờ bơtàu tơnguh ală gah lơh phan, kờp jơh khà priă mờr 9 rbô tơmàn đong. Bulah bè hơ̆, càr kung kờñ pal sền swì bơta gơ rềng mùl màl sră nggal lơh broă bal neh kĭ hơ dê:

“Ală sră nggal cih kah geh kĭ tàm Dơ̆ lơh chờ neh pờ geh uă tŭ niam lơh broă bal, mơya uă ngan mìng tàm jơnau hơ pơrgon bơh chờm. Cồng nha lam lơh mùl màl, khà sră pơrgon, sră blơi pham mờ priă lơh geh bơh kă bro tơnơ̆ tàm tơrbŏ bal kờñ pal pơn jat tai geh jat sền, tơrgùm wơl mờ sền swì. Ndrờm bè hơ̆ sơl, broă lơh hòi jà kă bro tàm măi mok sồ dilah mìng tơrgùm tàm ală dơ̆ lơh broă uă Dơ̆ lơh chờ dê den rơp kal ke ngan nàng lơh gơs gah tac phan sùm mờ kơnhăp kơ̆. Den tàng, jat Sờh Lơh sa mờ măi mok mờ Kă bro phan, tơnơ̆ Dơ̆ lơh chờ kờñ pal tam gơl pràn bơh “hòi jà jat broă bơyai lơh” gơ gơs “hòi jà pơgồp bal mờ drà kă bro mờ cồng nha kă bro”.

Đơs pơn dut pơrjum, ồng Đào Mỹ - Phó Chủ tịch Anih duh broă Làng bol càr Dăk Lăk, Lam bồ Mpồl bơyai lơh dơ̆ lơh chờ sồr sền wơl tơl làm ală bơta ờ niam, tơnguh bơta mờng chài mờ kơnòl pơgồp bal tàm ală broă lam lơh. Broă rơcang ală jơnau lơh nền dơ̆ lơh chờ nam 2028 kờñ pal geh lơh gờñ, jàu loh kơnòl mờ rơcang lài priă jền, ngan là tàm yal tơnggit, tac phan lơh gơs:

“Jơh nùs cribơyai, yal tơnggit, tàm tơrbŏ ală phan lơh gơs, dùl đah là yal tơnggit tàm anih kă bro điện tử, bulah bè hơ̆ kung gam pal gàr sùm yal tơnggit mờ tac bro phan jat broă lơh yau. Añ sồr Mpồl bơyai lơh, anih duh broă sùm cih dờp jơnau đơs tă pơgồp, cribơyai mờ jơnau tàm bơyai ală sở dê mờ ală sàh lơh sir yal wơl, hơ̆ sồng tă pơgồp jơnau đơs Anih duh broă Làng bol càr in mờ geh jơnau yal ai kơnòl broă dơ̆ lơh chờ nam 2028 in”.