Dơ̆ lòt còp ngan ngồn lơgar Kộng hoà Làng bol lơh tờm Làng bol Lào bơh ồng Lê Minh Hưng, Thủ tướng Chính phủ dê ờ mìng ƀươn soh là lơh broă cribơyai broă mờ lơgar ndai lơm mờ gam là jơnau pơyua pràn kơldang bè bơta wèt sền, bơta khin cha mờ bơta ai lài dờng ngan rlau jơh tàm gùng dà broă lơh lơh broă mờ lơgar ndai bơh Việt Nam dê tàm tŭ tơngai bơtàu tơngguh pa. Dơ̆ lòt còp là tŭ niam nàng kwang đơng lam bàr lơgar tam pà bơta wèt sền mờ pơlam gùng lài ală broă kơnhoàl ù tiah do mờ ală lơgar sền gròi bal.

Bơta dùl nùs bal mờ pơgồp bal đah Việt Nam mờ Lào tàm ală anih cribơyai uă gah bè Asean, Liên hợp quốc mờ ală tơngume lơh broă bal tiah dềt Mê Kông lơh gơnoar broă kwơmàng tàm broă lơh kơ̆ kơl jăp wơl nùs nhơm tam klăc tàm dơlam is mpồl, gàr jơnau đơs bal mờ sền gàr tiah ơm kis ring lơngai, kơ̆ kơl jăp bơh jơh gùt kơnhoàl ù tiah do dê. Dơ̆ lòt còp bơh ồng Lê Minh Hưng, Thủ tướng Chính phủ dê tus lơgar Lào ngan là broă lơh rơcăng lài nàng lơh tam gơl ală jơnau hơ gơgơs cồng nha ngan ngồn, pờ gơlik ală tŭ niam pa ai bơta lơh broă bal ngan ngồn, geh cồng nha mờ kơnhăp jŏ đah bàr dà lơgar, bàr jơi bơtiàn.