Tàm dơ̆ boh bơr bal, làng bol tơlik nùs nhơm pin dờn gơwèt mờ broă đơng lam, sồr lơh bơh kwang đơng lam bồ càr Lâm Đồng dê tàm bơta càr gơtìp mờ uă kal ke, bơta lòng. Mờ kơ̆p kờñ càr Lâm Đồng pal tơrgùm bơtàu tơnguh bơta pràn tàm gah broă lòt nhơl mờ lơh broă sa suơn sre; lơh pràn broă tam gơl sồ, lơh sa sồ; sền kwơ broă bơcri priă lơh gùng lòt, tàm hơ̆ uă ngan là ală rơndăp broă lơh gùng lòt rơndeh lòt mhar ù gờl tờm bè Tân Phú - Bảo Lộc, Bảo Lộc - Liang Khàng mờ Dà Làc - Nha Trang nàng ƀuơn tàm broă tơrbŏ bal tiah, tàm dơlam tiah, lơh pràn lơh sa mpồl bơtiàn bơtàu tơnguh.

Củ tịc Anih duh broă Làng bol càr Lâm Đồng ồng Trần Hồng Thái đơs nền càr Lâm Đồng gam tàm tơngai pờ gùng dờng nàng bơtàu tơnguh, gam lơh ngan lơh gùng rơndeh lòt mhar pờ mpồng bơh đah Jum, ală gơl gùng tơrbŏ bal tiah Tây Nguyên, Đah jum măt tơngai lik, Đah jum Tàm gùl lơgar. Ồng Trần Hồng Thái pà git, nam pa, càr Lâm Đồng rơ̆p mŭt lơh gùng rơndeh lòt mhar. Geh gùng lòt pa geh broă bơtàu tơnguh pràn kơl dang. Tàm bơh 2 tus 3 nam tus, càr Lâm Đồng rơ̆p ai lài bơtàu tơnguh phan bơna gùng lòt.

Kung tàm dơ̆ cri bơyai, Củ tịc Anih duh broă Làng bol càr Lâm Đồng neh cri bơyai mờ ala măt làng bol bè broă dong kờl bơtàu tơnguh lơh sa mờ măi mok, broă lơh drơng ala, lòt nhơl, lơh sa suơn sre mờ măi mok pa, tam gơl sồ, bơto cau lơh broă, hòi jà bơcri priă, lơh sa tơlir, tiah kis, lơh sơnơm, bơto bơtê tàm tơngai tus càr dê.

Bal mờ hơ̆, làng bol kung đơs tus, dan, sồr kwang đơng lam bồ càr Lâm Đồng tơnguh rơlao tai broă atbồ phan geh is-tiah kis, lơh mhar broă tơm ntrờn ù tiah, lơh ƀòn ơm kis pa bơh ală rơndăp broă lơh tờm, bơtàu tơnguh hìu ơm mpồl bơtiàn, ai sră dờp gơnoar ngui ù…

Jăt mờ hơ̆, broă rơndăp ù tiah lời ing mờ jŏ tơngai, lơh hoàc huơr phan geh is mờ lơh kal ke tus mờ broă bơtàu tơnguh càr dê den tàng pal gờñ geh bơsong. Ồng Păng Ting Sin, kis tàm ƀòn drà dềt Lạc Dương, kơnhoàl Lạc Dương, càr Lâm Đồng đơs: “Tàm ƀòn drà dềt Lạc Dương bol añ geh uă ngan rơndăp ù tiah gơtìp tàm bơrlŭ bal mờ lời jĭ tơngai, geh rơndăp ù tiah jŏ tus 20 nam mơya he kung gam ờ hềt geh lơh. Kơ̆p kờñ uă ngan bơh làng bol dê là ală rơndăp ù tiah ờ geh cồng nha, ờ tơl pràn den pal sơrbì, mờ di lah geh rơndăp ù tiah den pal geh lơh mơ”.

Rơlao 20 jơnau đơs bơh ală cau ala măt tàm dơ̆ cri bơyai neh ai gŏ ală bơta kal ke tŭ rơndăp ù tiah lơh phan kwơ tàm ù gơtìp gơrềng tus mờ gơnoar kwơ làng bol dê tàm broă lơh sră ngui ù; pal geh gùng dà broă lơh jŏ jòng nàng sền gàr bơta kwơ ai làng bol lơh broă sa in ròng kơnrồ dà toh tơnơ̆ mờ tŭ geh git nđờ rơhiang nơm kơnrồ dà toh tàm càr gơtìp chơ̆t tơnơ̆ mờ tŭ cih vaccine, rơndăp ù tiah gơtìp tàm bơrlŭ bal, sền gàr tiah kis. Bơdìh hơ̆ tai, ală cau ala măt kờñ pal tơrgùm bơtàu tơnguh bàr gah geh bơta pràn càr Lâm Đồng dê là lòt nhơl mờ lơh sa suơn sre, tàm hơ̆ uă ngan là lơh sa suơn sre mờ măi mok pa, ngăc ngar; lơh pràn broă tam gơl sồ.

Đơs pơn dŭt dơ̆ cri bơyai, ồng Nguyễn Thái Học, Atbồ ing Ƀí thư Tỉñ ủy càr Lâm Đồng đơs nền, kwang đơng lam bồ càr Lâm Đồng nền nìn iăt jơh ală jơnau đơs, jơnau dan, jơnau pơgồp bal bơh ala măt ală làng bol dê. Mờ hơ rơ̆p tơrgùm bơsong ală bơta kal ke, gơkòl do nàng lơh pràn càr Lâm Đồng bơtàu tơnguh tơl ală bơta, kơ̆ kơl jăp. “Añ sồr Cơl dŭ lơh broă Tỉñ ủy pơgồp bal mờ Cơl dŭ lơh broă Anih duh broă Làng bol càr tơrgùm tơl ală jơnau đơs bơh ală cau ala măt mờ yal tus ală sở, gah lơh broă, mpồl lơh broă, ală kơnhoàl, ƀòn dờng tàm gùt càr in pal geh kơnòl sền wơl nàng bơsong, yal cồng nha tus mờ Mpồl duh broă sùm Tỉñ ủy in. Geh ală broă gơwèt gơnoar bơh kwang đơng lam bồ càr dê den geh sền nàng bơsong, broă lơi gơwèt gơnoar broă bơh Dà lơgar dê den càr geh dan mờ Dà lơgar”.

Atbồ ing Ƀí thư Tỉñ ủy càr Lâm Đồng ồng Nguyễn Thái Học đơs nền jơnau hơ pràn kơl dang bơh Duh broă sùm Tỉñ ủy càr, Mpồl lơh kơnòl broă sùm Tỉñ ủy càr lơh ngan tam klăc bal, lơh ngan jơh nùs, jơh pràn tài bơta bơtàu tơnguh càr Lâm Đồng dê; lơh broă geh kơnòl, nền nòn, song dơ pă, ờ tài bơta kwơ is mờ song niam; jơh nùs kơ̆ dơn ala ală kwang bàng lơh kơryan bơta bơtàu tơnguh càr dê.