Ngai òr (30/06), tàm Anih tờm Pơrjum càr Gia Lai pa, Lam bồ Mpồl Mblàng yal bơto bơtê mờ Hòi jà làng bol Dà lơgar dê ồng Nguyễn Trọng Nghĩa neh đơng lam mờ yal ală jơnau lơh nền tàm pơrjum, jơnau lơh nền kwơmàng bơh Dà lơgar mờ ƀòn lơgar dê gơrềng tus broă tơmŭt bal mpồl lơh broă sră pơ àr gơnoar ătbồ càr Gia Lai mờ càr Bình Định.

Đơs sồr lơh tàm dơ̆ bơyai lơh, ồng Nguyễn Trọng Nghĩa đơs nền, broă rơndăp tăp sèng mpồl lơh broă sră pơ àr gơnoar ătbồ kâp càr ờ mìng là bơta rề ơnàng bè bă ù halà kờp làng bol lơm mờ gam lơh gơlik geh ală jơnau tơl pràn bơtàu tơngguh pa tơl làm. Càr Gia Lai pa rơ̆p geh tŭ niam bơtàu tơngguh pràn kơldang tàm ală broă, bè: lơh sa mờ măy mŏk, broă lơh sa sươn sre măy mŏk pa, năng lượng lơh geh wơl, drơng broă, anih ơhò dà lềng ơm, logistics mờ lòt nhơl. Broă tơrgùm dùl Gia Lai mờ Bình Định mờ măt hòi càr Gia Lai ờ mìng lơh gơlik geh dùl ù tiah lơh sa mờ cíñ trị pa mờ gam pờ ơnàng tŭ niam nàng càr Gia Lai in bơtàu tơngguh tơl làm rlau. Mờ bơta wèt sền jŏ jòng mờ bơta đơng lam kràñ cê jơh nùs, càr Gia Lai geh kơ̆p gơn rơ̆p gơgơs dùl ƀòn lơgar lơh krơh lài, tă pơgồp uă ngan tàm bơta bơtàu tơngguh bal bơh kơnhoàl ù tiah do dê mờ bơh jơh gùt lơgar dê.