Jơnau yal bè gơl gùng rơndeh lòt mhar pa tơrbŏ bơh Pleiku gan Buôn Ma Thuột tus Gia Nghĩa gam dờp geh uă bơta sền gròi bơh làng bol Tây Nguyên dê, tiah geh bơta pràn bè lơh sa suơn sre mờ jơnau kờñ jun pơndiang phan dờng ngan. Bi Nguyễn Phúc Lâm, cau măi rơndeh kong goa gơl Gia Lai - ƀòn dờng Hồ Chí Minh đơs:

“Pa do, geh jơnau sồr lơh gùng rơndeh lòt mhar Pleiku - Dăk Lăk - Gia Nghĩa, dilah lơh gơtùi den añ gŏ geh kuơ ngan. Tài jun pơndiang phan bơna lòt tàm gùng rơndeh lòt mhar kung niam rlau mờ lòt gùng dà lơgar, lòt gùng rơndeh lòt mhar den lơngăp lơngai, lơh geh bơta kuơ tai”.

Ồng Vũ Duy Hùng - làng bol sàh Gào, càr Gia Lai chờ hờp kơp gơn gùng rơndeh lòt mhar gờñ geh lơh:

“Añ chờ hờp ngan. Lài ngan là lòt rê ƀuơn ƀuài, tơngai lòt rê lơyah rlau, phan lơh gơs bơh suơn sre jun pơndiang mhar rlau. Làng bol mìng kơp gơn bè hơ̆, dà lơgar bơtàu tơnguh den làng bol bơtàu tơnguh”.

Jat jơnau sồr kơlôi sơnơng, gơl gùng rơndeh lòt mhar Pleiku - Buôn Ma Thuột - Gia Nghĩa là dùl bơnah bơh gùng rơndeh lòt mhar tiah đah tô - tiah đah jum hờ tiah đah mat tơngai mut. Gùng do jòng mờr 258 kơi sồ, tơngai sơn rờp geh 4 bơnàng gùng, kờp jơh priă bơcri lơh bơh sơn rờp mờr 77 rbô tơmàn đong. Anih bơh chờm gơl gùng dê kờp dŭ tàm tơrbŏ mờ Gùng dà lơgar 19 tàm tiah Bàu Cạn, lòt gan ù tiah càr Gia Lai, Dăk Lăk lài mờ tŭ tàm tơrbŏ bal tiah Gia Nghĩa mờ gùng rơndeh lòt mhar Gia Nghĩa - Chơn Thành, càr Lâm Đồng.

Ồng Thái Đại Ngọc, Kwang geh jơng Đảng dà lơgar, Bí thư Tỉnh ủy càr Gia Lai đơs là, gơl gùng rơndeh lòt mhar do ờ mìng lơh gơlik bơta gơn kơnờm bơtàu tơnguh lơh sa mờ gam pơgồp bơnah sơlơ tơnguh tai bơta tàm tơrbŏ bal, gàr niam lơngăp lơngai dà lơgar tiah Tây Nguyên:

“Gơtùi đơs nền gơl gùng rơndeh lòt mhar do là bơta tờm tàm tơrbŏ bal tiah Tây Nguyên mờ lơh gơlik bơta gơn kơnờm ai 3 càr in, gơtùi lơh niam ală phan lơh geh bơh suơn sre jat gùng dà ngui măi mok pa. Rơp dong tơrbŏ bal kơ̆ sền gàr dà lơgar, lơngăp lơngai mờ ală lơgar geh bal gùng nhàr lơgar jat gùng dà bơtàu tơnguh jŏ jòng. Gơ wèt mờ Gia Lai là 56,7 kơi sồ, rơp tàm pơnring kes priă pah nam, den bol hi kung rơp lơh gơtùi”.

Tŭ do, gơl gùng rơndeh lòt mhar Pleiku - Buôn Ma Thuột - Gia Nghĩa gam tàm bơnah kơlôi sơnơng, sồr bơcri priă lơh. Bulah gam kờñ tai tŭ tơngai nàng lam lơh, mơya làng bol mờ gơnoar atbồ ală càr Tây Nguyên gam kơp kơnờm gơl gùng do rơp gờñ geh lơh gơs, lơh gơlik bơta ƀuơn ai lòt rê, jun pơndiang phan bơna mờ lơh gơlik tai tŭ niam bơtàu tơnguh lơh sa ai tiah do in.