“Jơh nùs lơh ngan, kràñ cê jơh nùs lơh jat niam broă rơndăp lơh bơcri priă Dà lơgar nàng kờñ pơgồp bơnah lơh geh jơnau kờñ gơguh 8%. Do là jơnau sồr bơh Phó Thủ tướng Cíñ phủ ồng Mai Văn Chính dê tàm pơrjum pờ tơlik tơn tàm internet bơh Mpồl Lơh broă sồ 7 bè sền sơwì sồr pơ jal, tă bơsong kal ke, kòl yan sơlơ tơnguh tai priă bơcri Dà lơgar nam 2025 bơh 5 càr Tây Nguyên dê. Tàm dơ̆ pơrjum ală tiah neh yal mờ lơh loh ală kal ke, kòl yan, jơnau tờm gơbàn mờ sồr đơs gùng dà broă lơh bơsong gơwèt mờ bàr pe rơndăp broă lơh bơcri priă Dà lơgar dê.

Đơs tàm pơrjum, Phó Thủ tướng ồng Mai Văn Chính đơs loh, nam do là nam nàng bơtàu tơnguh tam gơl pràn, lơh jat broă rơndăp lơh 5 nam bơh nam 2021-2025, mờ nùs nhơm lơh ngan gơguh bơh 8% rlau hơđang. Đơs loh Cíñ phủ, Thủ tướng Cíñ phủ sền gròi ngan đơng lam, sồr lơh kràñ cê jơh nùs uă ngan bè bơcri priă Dà lơgar dê, Phó Thủ tướng pà gĭt, pa do Cíñ phủ neh tơngơs 7 mpồl lơh broă sền gĭt wơl ală bơta lam lơh cồng nha lơh jat, bè tam pà priă bơcri, ai priă bơcri Dà lơgar dê. Jat Phó Thủ tướng, kơnòl broă bơh tŭ do tus lồi nam rơ̆p kơn jơ̆ kơn jŭt ngan, den tàng sồr, nàng bơyai lơh jat geh cồng nha ai priă bơcri Dà lơgar tàm tơngai tus, 5 càr Tây Nguyên pal pơn jat tai lơh pràn broă hòi jà tơrgùm bal jơh ală anih lơh broă cíñ trị mut lơh bal lơh jat kràñ cê jơh nùs mờ geh cồng nha. Bơh hơ̆, pơgồp bơnah tàm bơta bơtàu tơnguh lơh sa bơh Dà lơgar dê, lơh geh jơnau kờñ gơguh 8% tàm nam do.