Bơh ngai 01 nhai 3, kơnòl broă lơh pa mờ tam gơl sră ai măi rơndeh geh jào bơh Sờh Gùng lòt Pơn diang phan (tŭ do là Sờh Bơ̆t bơtàu) tus kwang àng ală càr, ƀòn dờng tàm gùt lơgar. Tàm càr Dăk Lăk, tơnơ̆ rơlao 20 ngai lơh, kwang àng càr neh dờp mờ bơsong rơlao 1 rơbô 500 pang sră lơh pa mờ tam gơl sră ai măi rơndeh làng bol in.

Nggùl nhai 2 nam 2025, Kwang àng càr Dăk Lăk neh sồr Cơl dŭ lơh broă Kảñ sát Gùng lòt, kwang àng ală sàh, sơnah ƀòn pơgồp bal mờ Sờh Bơ̆t bơtàu bơyai lơh jào, dờp atbồ phan lơh broă, măi mok drơng tàm broă atbồ mờ pơrlòng ai sră măi rơndeh. Mờ bơyai lơh sền wơl phan bơna tàm Sờh mờ 3 Anih pơrlòng tàm càr, lơh jăt bơh ngai 01 nhai 3. Tơnơ̆ rơlao 20 ngai lơh, tus tŭ do kwang àng sàh, sơnah ƀòn dờp 248 pang sră, cơl dŭ lơh broă kảñ sát gùng lòt neh dờp mờr 1 rơbô 300 pang sră mờ lơh pa, lơh tam gơl rơlao 1 rơbô nă cau in.