Ồng Trương Văn Quốc, 56 sơnam ơm tàm sàh Ea K’tur, càr Dăk Lăk pa blơi rơndeh oto 5 cơ gĕ neh ngui. Tơnơ̆ tŭ lơh gơs sră pơ àr ai sră nggal tờm tàm cơldŭ kảñ sát gùng lòt, ồng jun rơndeh rê tàm hìu mờ lòt Hìu lơh broă kwang àng sàh Ea K’tur nàng lơh sră pơ àr cih mat wơl. Bulah neh dờng sơnam mờ ờ chài ngui măi mok, mơya ồng Quốc geh kwang àng jơh nùs pơlam. Kơnờm bơh hơ̆, jơh tŭ tơngai cih mat rơndeh geh lơh mhar ngan. Ồng Quốc đơs: “Añ geh kwang àng gah cih mat, pơlam lơh sră pơ àr cih mat tàm phần mềm, yal dia mờ sền sồ khung, sồ măi. Tŭ do, añ neh tong priă dia, tơ lềt ai sồ mờ khi pơrgon kơp bơh 2 tus 3 ngai. Đơs bal là mpồl kwang àng sàh pơlam jơh nùs ngan làng bol in, sră pơ àr geh lơh mhar mờ ƀuơn ngan”.

Bi Nguyễn Minh Tuấn, cau lơh broă dùl mpồl lơh sa kă bro tac rơndeh ơto tàm Dăk Lăk pà git, pah nhai, mpồl lơh sa kă bro tac bơh 40 tus 50 nơm rơndeh pa. Lài do, sră pơ àr cih mat mờ ai ƀàng sồ rơndeh pal tong sră nggal tàm kwang àng càr halà kơnhoàl, roh uă ngan tŭ jơ. Bơh nhai 3 tus tŭ do, broă do neh geh lơh ƀuơn rlau kơnờm phần mềm điện tử, lơh bal mờ kwang àng sàh mờ ală anih tac rơndeh. Broă cih mat rơndeh tŭ do mìng roh 2, 3 jơ, nac blơi geh dờp ƀàng sồ tơnơ̆ 2, 3 ngai, ala mờ pal kơp jơh dùl poh halà tàm pơn jeh bè lài do: “Tŭ do, ờ duh pal còr sồ khung, sồ măi bè lài do tai, tài hìu măi khi neh crap sră yal sồ khung, sồ măi tàm sră pơ àr rơndeh. Cau blơi mìng yal jơnau tơnggit să tờm, geh kăn kươk làng bol, app yal mat khà 2 nàng bol hi in yal tong priă dia blơi phan mờ khi rơp geh jơnau yal pơyua tàm điện thoại. Hơ̆ sồng khi tong is priă mat halà cuyển khoản, tơnơ̆ hơ̆ ai ƀàng sồ tơn tàm điện thoại bơh phần mềm. Broă ai sồ, yal tong priă dia mìng roh 2, 3 jơ mờ tơnơ̆ hơ̆ lơh gơs ală sră pơ àr. Làng bol cih mat den ƀưu điện rơp pơyua ƀàng sồ rê tàm hìu”.

Thượng úy Nguyễn Tất Diệu, kwang bàng drơng broă cih mat rơndeh rơndồ lòt gùng ù gờl kwang àng sàh Ea K’tur yal, pah nhai, kwang àng sàh dờp bơsong mờr 200 sră nggal rơndeh moto mờ 60 sră nggal rơndeh oto, măi chŏ ù, măi cò ù… Tơnơ̆ tŭ sang tĕ kwang àng kâp kơnhoàl bơh ngai 01/3, jơh ală sră pơ àr lơh pa, lơh wơl, tam gơl mat cau tờm rơndeh… ndrờm geh lơh tàm phần mềm mờ điện thoại ngac ngar. Bơh ngai 01/7 pa do, mpồl kwang àng sàh geh tơnguh tai kwang bàng den tàng broă dờp sră nggal mờ lơh sră pơ àr cih mat rơndeh ƀuơn rlau. Thượng úy Diệu đơs là, tŭ làng bol neh kwèng rơhời mờ broă cih mat tàm internet, lơh neh chài den broă lơh ală sră pơ àr lơh sră rơndeh rơp sơlơ mhar rlau tai: “Rơndeh pa tŭ do geh cih mat tàm internet jơh tơn. Tŭ blơi rơndeh tàm anih tac, làng bol tong priă dia online tàm điện thoại, kwang àng rơp dờp sră nggal, bơsong mờ pơyua wơl cồng nha. Làng bol mìng kơp mờ dờp cih mat tàm hìu. Gơ wèt mờ rơndeh yau, rơndeh tam gơl mat cau tờm, rơndeh tac blơi wơl halà tam gơl măi mok, làng bol pal cèng sră pơ àr mờ rơndeh tus nàng bol hi sền mùl màl rơndeh. Dilah rơndeh ờ gơtìp tam gơl sồ khung, sồ măi, dà sờng ờ tam gơl pơn drờm mờ sră pơ àr tờm rơndeh dê den rơp geh ring bal mờ pơlam lơh sră cih mat bè rơndeh pa”.

Tơnơ̆ rlau nggùl nhai tơmut bal, càr Dăk Lăk pơn jat tai cih dờp geh git nđờ rhiang nơm rơndeh oto mờ rơndeh moto geh cih mat pa. Bulah khà rơndeh rơndồ cih mat ngai sơlơ uă, cau lơh broă ờ tơl, mơya mờ nùs nhơm geh kơnòl mờ lơh ngan drơng broă, kwang àng càr Dăk Lăk kung gam gàr sùm cồng nha broă lơh sră rơndeh. Ală tam gơl pa tàm broă tam gơl sồ ờ mìng tơrmù lơyah tŭ tơngai, tơrmù priă tă lòt rê mờ gam ai tơnggŏ loh làng nùs nhơm tài làng bol mờ drơng lơh.