Bàr jơnau rơcang cih adăt dờp geh broă sền gròi mờ pơgồp jơnau đơs uă ngan bơh ală cau ala măt dê là Adăt Rơndăp broă gơnoar atbồ sàh (tam gơl) mờ jơnau rơcang cih Adăt Cau pơgru.

Pơgồp jơnau đơs tàm jơnau rơcang cih Adăt cau pơgru, mò Lê Thị Kim Oanh, Phó kwang lam bồ Sờh Bơto bơtê mờ Bơsram càr Dăk Lăk đơs là: ală broă dong kờl pa, tàm hơ̆ is ồn gơwèt mờ cau pơgru bơto mầm non, bè ai ơm jơh sơnam lơh broă gờñ ngan 5 nam pơn drờm mờ sơnam geh ai ơm bal, dong kờl hìu ơm, sền gàr bơta pràn kơl dang să jan, bơto bơtê, bơtơl broă lơh là di pal mờ jơnau kờñ mùl màl, ai geh bơta pràn mpồl cau pơgru in iang nùs kis đềt mềr mờ broă lơh. Tài gàr sùm priă dong kờl tơngai lơh broă là broă nàng mpồl bơtiàn dờp mờ ưn ngài ală broă pơgồp bal do bơh mpồl cau pơgru dê mờ lam sồr ală cau pơgru geh sùm jŏ jòng mờ broă lơh, bơh tŭ hơ̆ gàr bơta niam broă bơto mờ kơ̆ kơl jăp sùm.