Tàm ală hìu bơsram tàm sơnah ƀòn Tiến Thành (tiah ƀòn dờng Phan Thiết, Bình Thuận yau), ală kal ke tàm măi mok sồ gam geh tă bơsong nàng cèng wơl cồng nha ngan ngồn rlau. Jơh ală hìu bơsram kấp dùl, kấp bàr ndrờm geh cơldŭ bơsram Tin họk geh rcang măi tính, măi sòl, ală loa, geh tivi. Cơldŭ hìu sền sră geh rcang măi tíñ nàng sền gĭt ală pang sră geh ƀuơn rlau tai. Ală cau pơgru neh ngui măi mok yal tơngĭt jơnau tàm sền sơ wì jơnau bơto bơtê, lơh ală jơnau bơsram điện tử. Ala tài bơh kƀàng jù cùr kò, tŭ jiơ lòt bơsram tàm ơdŭ bơh ùr pơgru Doãn Kim Trúc, cau pơgru Hìu bơsram kấp dùl Đức Long, sơnah ƀòn Tiến Thành geh ngui măi mok sồ mờ ală phần mềm, rùp hin, video niam ngan.

 “Să tờm añ kung bè hơ̆ sơl, tŭ he geh bơsram mờ geh rùp hin, hòi là sền mờ mat niam ngan, gơlơh ờ hoan làp rlau. Bàr pe nă kơnòm bơsram ờ hềt kwèng mờ hìu bơsram kấp dùl, den broă lơh hơ̆ lơh ală kơnòm dềt ƀuơn lơh kwèng rlau tai”.

Hìu bơsram kấp dùl Đức Long, sơnah ƀòn Tiến Thành geh bàr tiah bơsram, kơnờm geh bơnàng jă sồ den tàng ală broă lơh atbồ kwang bàng, cau pơgru, cau lơh broă mờ kơnòm bơsram kung ƀuơn ngan sơl bơh ală mpồl tàm internet. Ồng Võ Thanh Long, Kwang atbồ Hìu bơsram kấp dùl Đức Long, sơnah ƀòn Tiến Thành pà gĭt:

“Hìu bơsram neh ngui ală phần mềm mut ngui tàm broă lơh, bè: phần mềm atbồ ală jơnau yal tơngĭt, phần mền tă priă bơh mè bèp kơnòm bơsram mờ mè bèp kơnòm bơsram neh tong priă bơh tàm phần mềm do. Hìu bơsram neh sơlơ tơnguh tai crăp tàm Hìu sền sră 4 nơm măi tíñ nàng ai kơnòm bơsram in tàm tŭ lik nhơl mù tàm do jòi gĭt ală jơnau yal tơngĭt mờ ală kơnòm dê kờñ jòi tàm Google nàng gĭt loh tai”.

Ală hìu bơsram ndai tàm sơnah ƀòn Tiến Thành kung neh ngui măi mok sồ bơh broă atbồ kơnòm bơsram, jàu jơnau bơsram, cih jơnau bơsram tus bơto bơsram tàm ơdŭ. Is ồn, broă ngui măi sòl mờ ală măi mok điện tử tàm tơl dơ̆ bơsram dong jơnau bơsram sơlơ geh sền mờ mat tơn, niam ngan, tơnguh bơta pràn gĭt wă mờ cih kah bơh kơnòm bơsram dê. Ồng Phạm Thái Hùng, Phó Kwang atbồ Hìu bơsram kấp bàr Nguyễn Đình Chiểu pà gĭt, lài do ală jơnau yal tơngĭt bơh hìu bơsram dê uă ngan ơn prap mờ pơ àr lơm den tŭ do jơh ală bơta geh lơh mờ măi mok mờ ơn prap wơl tàm ală gah VNPT.   

“Hìu bơsram kung gam kơlôi sơnơng geh phần mềm lơi geh cồng nha, ờ uă priă jền mờ sền gàr ndơ̆p mờ kờp sền dilah geh ală bơta den atbồ broă kơnòm bơsram cèng điện thoại tàm hìu bơsram nàng lơh jơnau bơsram mbè lơi. Tài bơh rài kis kơnòm bơsram tàm do kung gam uă kal ke, ờ gŏ di là hìu bơnhă lơi kung geh điện thọai ngăc ngar lơm nàng oh kòn gơtùi ngui tàm broă bơsram. Mơya tŭ tơl ală bơta ai ală kơnòm in lơh jơnau bơsram tàm măi tíñ halà tàm điện thọai rơ̆p tơrmù ƀà bơta kơn jơ̆ geh uă broă lơh bơto ờs mờng dê”.

Ală hìu bơsram tàm Tiến Thành kơ̆p kờñ, nàng broă lơh tam gơl sồ ngan ngồn mờ geh cồng nha rlau tai, gah lơh broă geh gơnoar kờñ pơn jat tai pờ ơdŭ bơto bơtê, bơto pơlam tơnguh uă bơta gĭt wă, bơta chài ngui phần mềm ai cau pơgru in. Mơkung geh broă lơh dong kờl gơ wèt mờ ală phần mềm blơi mờ priă jền. Bơdìh hơ̆, ală jơnau yal tơngĭt bè làng bol ơm kis gờñ lơh sir, di ngan nàng ală hìu bơsram in lơh sir họk ƀạ sồ.