Tus tŭ do, 100% anih lơh broă bơh càr tus sàh bơh càr Lâm Đồng dê ngui internet yal tơngĭt jơnau sồ ờs ngui; sră nggal điện tử, akhar kĭ sồ lơh broă bè ờs mờ khà akhar kĭ sồ rlau 93%. Tàm Mpồng drơng broă dà lơgar, mờr 92% sră nggal pơyoa bơh tàm internet; khà bơsong di tơngai pơrgon rlau 97%, ngui tam gơl sồ, ngui tai ală jơnau yal tơngĭt rlau 95%.

Jat ồng Lê Thanh Liêm, Phó Kwang lam bồ Sờh Jak chài mờ Măi mok càr Lâm Đồng, broă tàm jàu tam gơl sồ neh dong pơnđàng ală jơnau yal tơngĭt càr- sàh, tơrmù sră pơ àr, tơn lơyah tơngai bơsong sră nggal. Bulah bè hơ̆, càr kung gam gơtìp kal ke tài bơh ală jơnau yal tơngĭt gam rah rài, lơh jat ngan ngồn lơyài mờ ờ tơl cau lơh broă măi mok yal tơngĭt jơnau kấp sàh. Tàm tơngai tus, Sờh Jak chài mờ măi mok càr Lâm Đồng rơ̆p tơrgùm lơh ală jơnau yal tơngĭt ngui bal, tơnguh cồng nha lơh broă bơh Anih tờm Đơng lam ngăc ngar mờ bơtàu tơnguh cau lơh broă sồ tàm kấp hơđơm in.