Ngai 14/5, tàm dơ̆ pơrjum mìng dùl tơngume, Mpồl duh broă Làng bol càr Khánh Hòa neh ring bal uă jơnau lơh nền tàm pơrjum kuơmàng bè bơtàu tơnguh lơh sa - mpồl bơtiàn. Pal sền gròi là càr Khánh Hòa neh ring bal jơnau lơh nền lam lơh Rơndap broă lơh gùng ù gờl rơndeh lòt mhar Nha Trang - Dà Làc jat broă lơh lơh bal dà lơgar mờ nă să is (PPP). Jat jơnau lơh nền tàm pơrjum, Mpồl duh broă Làng bol càr jàu Anih duh broă Làng bol càr Khánh Hòa lơh anih lơh broă geh gơnoar lam lơh rơndap broă lơh jat jơnau sồr tŭ do.

Càr Khánh Hòa kờp dŭ rơp ai mờr 1 rbô 500 tơmàn đong bơh broă rơndap lơh bơcri priă dà lơgar tơngai bơh nam 2026 tus nam 2030 nàng lam lơh tơm wơl priă, ai ù lơh rơndap broă, dong kờl mờ rơndap ƀòn ơm kis pa. Rơndap broă lơh gùng rơndeh lòt mhar Nha Trang - Dà Làc (mờ kờp jơh priă bơcri lơh kờp dŭ rlau 25 rbô tơmàn đong) geh gơtha kuơmàng ngan tàm broă tơrbŏ bal bơtàu tơnguh đah càr Khánh Hòa mờ càr Lâm Đồng. Gơl gùng do rơp lơh gơs tai gùng tơrbŏ tiah Tây Nguyên mờ tiah kềng gah dà lềng đah jum tàm gùl lơgar, tơnguh bơta pràn tàm tơrbŏ bal anih ơhò dà lềng ơm, anih tờm lơh sa mờ ală anih lòt nhơl.