Chờ hờp tìp măt ală cau tàm mpồl kơnòm dềt pơnrơ ngan, Tổng Ƀí thư, Củ tịc lơgar ồng Tô Lâm yal wơl pơgăp mờ do 85 nam, tàm bòl glar kal ke bơh kăc màng dê, Mpồl Kơnòm pa tàu Lam lài Hồ Chí Minh tơlik măt mờ gơgơs rơkàng hìu kờñ gơboh bơh kơnòm dềt Việt Nam dê, uă krơh tàm tam lơh ală lơgar bè Kim Đồng, Lê Văn Tám, Kpă Klơng mờ gĭt nđờ nă kơnòm pa tàu khin cha jak chài neh lơh àng gơcrà nùs nhơm “sơnam dềt bồ tơngoh dờng”.

Tổng Ƀí thư, Củ tịc lơgar ồng Tô Lâm đơs wih đơs wơl 5 bơta Wa Hồ bơto hơ̆ ngan là ală bơta kwơ jrô ơnàng nàng ală sau bơsram, bơsram tàp mờ dờng kràñ. Yal bè bơta wèt sền tus nam 2045, tơngkah kir sơnrai 100 nam tơnggơs lơgar, Việt Nam gơgơs lơgar bơtàu tơngguh geh priă lơh geh uă, Tổng Ƀí thư, Củ tịc lơgar đơs là uă sau ngai do rơ̆p ơm tàm sơnam tă pơgồp niam ngan rlau jơh, să tờm tơn bơ̆t bơtàu, sền gàr mờ lơh pơnrơ muh măt dà lơgar.