Pơrjum bơh 6 ƀòn lơgar geh ală sơnah ƀòn: Xuân Hương – Dà Làc, Lâm Viên – Dà Làc, Xuân Trường – Dà Làc, Cam Ly – Dà Làc, Lang Biang – Dà Làc mờ sàh Lạc Dương pơgồp bal bơyai lơh, nàng kờñ yal tơnggĭt bơta pràn, măt rơndăp broă lơh mờ iăt kơno jơnau đơs bơh mpồl lơh sa kă bro, cau bơcri priă dê.

Mờ bă ù ơnàng rlau 1 rbô 500 kơi sồ vuông, khà kờp làng bol rlau 314 rbô nă, ơm bal tàm ù tiah ƀòn brê bơnơm Dà Làc – Lạc Dương, 6 ƀòn lơgar geh nhơm trồ tiah ndrờm bal, bơta jơnhoa kờp bal pơgăp 1 rbô 500 thơk, ƀươn ƀoài bơtàu tơngguh lòt nhơl ơm rlô pràn să, broă lơh sa sươn sre măy mŏk pa, tiah drà ƀòn brê bơnơm mờ drơng broă sa priă niam uă.

Uă rơndăp broă lơh gam geh hòi jà bơcri priă tàm ală gah broă tiah drà, kă bro phan, lòt nhơl, phan bơna bơ̆t bơtàu. Bulah bè hơ̆, mpồl lơh sa kă bro đơs là bàr pe gơkòl jŏ jòng kờñ pal gờñ geh tă bơsong. Ồng Lê Văn Cường, Kwang Lam bồ Kông ty Kong kơnòl nă să is Dà Làc GAP yal bơta gơkòl ngan ngồn bè ù tiah:

“Bol hi gam gơtìp kòl là ù den geh mơya ù hơ̆ là ù bơdìh ù brê ờ hềt geh pà sră cơng tàng sră pơ àr ù. Tài bè hơ̆, tŭ bol he lơh màh tiah kung gơkòl, mờ bol hi kờñ priă nàng càn anih priă jền den anih priă jền gơ sồr là pal geh jơtài, geh sră ngui ù”.

Kơnhoàl ù tiah 5 sơnah ƀòn Dà Làc mờ sàh Lạc Dương geh đơs gam bơcah bơcài ù, ù tiah bơtàu tơngguh dờng mơya bơta pràn ờ hềt jòi lơh ndrờm pal. Bơh ală gơkòl mpồl lơh sa kă bro đơs, ồng Nguyễn Hồng Hải, Phó Chủ tịch Anih duh broă Làng bol càr Lâm Đồng sồr ală ƀòn lơgar mờ sờh, gah pal rơcăng nền rlau lài mờ tŭ ai rơndăp broă lơh nàng hòi jà; kờp sền wơl rơndăp ù tiah, sră nggal dipal mờ adăt boh lam, bơta geh ngan ù tiah, lơh sir sră nggal mờ ală bơta sồr lam lơh, pleh jơnau gơhòi gơ jà geh cau bơcri priă rao den tơnơ̆ hơ̆ sồng pơn jăt tai tă bơsong gơkòl.

“Añ sồr đơng lam 5 sơnah ƀòn mờ sàh Lạc Dương kung bè đơng lam ală sờh, gah kờñ pal kờp sền wơl sră nggal dipal mờ adăt boh lam rơndăp ù tiah tiah drà. Tơngume tàm dơlam gơ geh lơh geh jơnau sồr bơh cau bơcri priă dê halà ờ? Lơh ngan lơh gơ in kơ̆ kơl jăp nàng ờ geh bơta mờ rơndăp broă lơh tơnơ̆ tŭ neh gơhòi gơ jà rao, cau bơcri priă lam lơh tơnơ̆ hơ̆ den geh wơl jơnau là lam tă bơsong kal ke, gơkòl ai rơndăp broă lơh in”.

Tơnơ̆ pơrjum, đơng lam càr Lâm Đồng sồr ală ƀòn lơgar tơrgùm bal, sac rwah tơl jơnau đơs bơh mpồl lơh sa kă bro dê, gĭt nền loh làng kơnòl bơsong mờ jăt sền tus dì tŭ geh cồng nha. Càr Lâm Đồng hơ pơn jăt tai lòt bal, tă bơsong kal ke jăt jơnau cih kơrnoăt boh lam dê, lơh geh tiah ƀươn nàng ală rơndăp broă lơh in geh lam lơh ngan ngồn, geh cồng nha.