Pơrjum bơyai mờ bơta tus bal bơh ala mat Mpồl, Bộ, gah, Anih kơlôi sơnơng, hìu bơsram, ală tiah geh dà lềng tàm tơngai Chính phủ pa ai lơh jat Jơnau lơh nền tàm pơrjum sồ 218 bè broă lơh lơh broă lơh jat Jơnau lơh nền tàm pơrjum sồ 20 bơh Mpồl duh broă Đảng dà lơgar khoă XIV dê bè bơt bơtàu, bơtàu tơnguh Việt Nam gơ gơs dà lơgar dà lềng pràn. Jak chài, măi mok, tam gơl pa bơceh lơh mờ tam gơl sồ ờ mìng geh sền gĭt geh gơnoar broă dong kờl lơm mờ gam sền gĭt là dùl tàm ală bơnàng jă nàng tơnguh uă bơta pràn jak dà lơgar bè dà lềng dê.

Ồng Trần Tuấn Anh, Phó Chủ tịch Anih kơlôi sơnơng Jak chài mờ Măi mok Việt Nam đơs là, dùl dà lơgar dà lềng pràn ờ mìng geh uă anih ơhò ơm dà lềng, ơhò plung halà lơh sa dà lềng dờng lơm, mờ pal wă là, jơnau kờp dŭ lài mờ atbồ geh dà lềng, ngui kơ̆ kơnhăp phan kwơ tàm dà lềng mờ lơh tờm ală măi mok dà lềng pa ngan. “Pal bơt bơtàu dùl mpồl kơlôi sơnơng dà lềng dà lơgar ngan ngồn, dùl dà lơgar dà lềng pràn ờ gŏ dì mìng kơnờm tàm dùl anih kơlôi sơnơng halà dùl Bộ, gah lơm. Mpồl kơlôi sơnơng dà lềng geh bơta tus bal bơh ală Anih kơlôi sơnơng, ală hìu bơsram đại họk, ală Bộ, gah atbồ dà lơgar, ală mpồl lơh broă tàm dà lềng, ală tiah jat kềng gah dà lềng, ală mpồl lơh sa kă bro lơh broă bè dà lềng mờ ală cau lơh broă bal”.

Là ƀòn lơgar geh bơta ƀuơn, bơta pràn is ồn bè dà lềng, Khánh Hòa geh mờr 490 kơi sồ gah dà lềng, rlau 200 bồt, ală pòt dà lềng dà jrô Vân Phong, Nha Trang, Cam Ranh mờ tiah is ồn Trường Sa, bal mờ ală anih kơlôi sơnơng, bơto bơtê jrô ơnàng. Ồng Nguyễn Thanh Hà - Phó Chủ tịch Anih duh broă Làng bol càr Khánh Hòa pà git, lơh jat Jơnau lơh nền tàm pơrjum sồ 20 sồr pal tam gơl pràn bơh tơnhàu dà lềng gơ gơs đơng lam broă dà lềng dờng pa, jat tàm bơta gĭt wă mờ măi mok. Khánh Hòa dan Dà lơgar sền gròi bơcri priă lơh ală phan bơna kơlôi sơnơng ngui bal kâp dà lơgar bè ơhò kơlôi sơnơng dà lềng jrô, cơldŭ tơrlòng lài kuơmàng, ală trạm sền gròi ngac ngar tơrgùm bal; mờ kung sền swì ai Anih tờm kơlôi sơnơng dà lơgar bè măi mok dà lềng dờng Khánh Hòa mut tàm rơndap ù tiah ală anih tờm, cơldŭ tơrlòng lài kuơmàng dà lơgar bè măi mok kuơmàng: “Càr Khánh Hòa hơ pơrgon lời ai priă jền lài uă ngan rlau ơh, rơcang ù tiah, kơrnoat boh lam, phan bơna bơt bơtàu kung bè pơgồp bal nền nòn mờ ală anih kơlôi sơnơng, hìu bơsram tàm càr nàng dờp, lam lơh geh cồng nha ală rơndap broă lơh kơlôi sơnơng, tàm jàu măi mok”.

Ồng Vũ Hải Quân - Ƀộ trưởng Bộ Jak chài mờ măi mok pà git, Jơnau lơh nền tàm pơrjum sồ 20 ai tơlik bơta tam gơl kuơmàng pal geh gơ wèt mờ jak chài, măi mok dà lềng. Ƀộ Jak chài mờ Măi mok rơp tă pơgồp jơnau đơs Chính phủ in bè broă rơndap lơh lam lơh jat Jơnau lơh nền tàm pơrjum sồ 20, tơrgùm sac rơ wah ală kơnòl broă jak chài, măi mok, tam gơl pa bơceh lơh mờ tam gơl sồ dà lềng kuơmàng tơngai bơh nam 2026 tus nam 2030: “Ƀộ Jak chài mờ Măi mok rơp tă pơgồp jơnau đơs Chính phủ in mùl màl broă rơndap lơh lam lơh jat Jơnau lơh nền tàm pơrjum sồ 20. Gơ ngan ngồn geh cồng nha, gơ geh uă ngan gah broă dà lềng ơnàng, gơ hòi gơ jà bè hơ̆ tàm jak chài măi mok den gơ kung ơnàng ngan sơl. Ƀộ Jak chài mờ Măi mok rơp lơh ngan rơndap tap sèng jat bơta ai lài nàng gơtùi lam lơh dùl bă geh cồng nha. Geh ală bơta bol he pal lơh jŏ jòng, lơh niam ngan mơya geh ală bơta den gơtùi bơcri priă nàng lơh geh cồng nha”.