Tus tŭ do, geh rlau 7 rơbô rơndăp broă lơh bơh ală cau bơcri priă lơgar Lo dê gam ngan ngồn bơcri priă tàm lơgar Việt Nam, kờp jơh priă dan bơcri lơh mờr 37 tơmàn dolar Mỹ, tơrgùm ngai sơlơ uă tàm lơh gơlik phan, mòn lơh, phan bơna bơt bơtàu, năng lượng, điện tử mờ măi mok. Tàm dơ̆ tìp mat, ồng Lê Minh Hưng, Thủ tướng Chính phủ đơs nền: bơta gĭt gơ̆p Việt Nam mờ Lo gam bơtàu tơnguh niam ngan, bè ờs, ngai sơlơ gơ lòt mut jrô. Lo là lơgar lơh broă kă bro phan dờng ngan rlau jơh lơgar Việt Nam dê; Việt Lam là lơgar lơh broă bal kă bro dờng ngan rlau jơh lơgar Lo tàm Asean.

Yal bè ală bơta pơn rơ ngan tàm ală bơta lơh sa - mpồl bơtiàn bơh Việt Nam dê tàm tơngai pa do, Thủ tướng đơs sùm, tơngai pa ờ mìng ai tơlik broă lơh broă bal, bơcri priă “uă rlau tai” lơm mờ pal “niam rlau tai”, “kơ̆ kơl jăp rlau tai” mờ “geh cồng nha, ngan ngồn rlau tai”. Thủ tướng sồr ală mpồl lơh sa kă bro lơgar Lo tam gơl pràn bơh bơcri priă tus cồng nha, măi mok, priă lơh geh tai mờ tam gơl pa bơceh lơh; sơlơ tơnguh tai lơh bal, lơh geh ală bơta ai mpồl lơh sa ka bro Việt Nam tus bal ală drà tăc bro; bơcri priă jat tơl jơnau sồr tơlir, kơ̆ kơl jăp; sền gròi rài kis, gơnoar kwơ di pal bơh cau lơh broă dê mờ lơh jat niam kơnòl mpồl bơtiàn. Chính phủ Việt Nam rơ̆p pơn jat tai iăt kơno, lòt bal, sền gàr gơnoar kwơ mờ bơta kwơ di mờ adat boh lam, di pal bơh cau bơcri priă dê; lơh geh ală bơta nàng mpồl lơh sa kă bro in bơcri priă lơh, lơh sa kă bro geh cồng nha, kơ̆ kơnhăp tàm lơgar Việt Nam.