Broă lơh tơrgùm rlau 150 nă cau ala mat là kwang bàng Đoàn, cau tàm mpồl ơruh pơnu mờ ală cau kă bro kơnòm să geh pơn rơ jak pe lơgar dê. Đơs tàm broă lơh, ală cau ala mat ndrờm đơs sùm: Việt Nam - Lào mờ Campuchia neh bal mờ gơp tam pà kah yau, tìp mat lơh kwèng đềt mềr jŏ rài; neh geh tŭ lòt bal, dong kờl gơp sơrlèt gan ală tŭ tơngai kal ke bơh kah yau tam lơh tơngklàs jơi bơtiàn dê.

Tàm rài pa, pe lơgar pơn jat tai lòt bal tàm broă lơh bơt bơtàu, sền gàr mờ bơtàu tơnguh dà lơgar. Bơta git gơp lơh bơyô là bơnàng jă kuơmàng ngan nàng ală ƀòn lơgar rề ơnàng lơh broă bal ngan ngồn tàm uă gah broă: lơh sa, kă bro phan, bơcri priă, bơto bơsram, jak chài - măi mok, niam chài mờ lòt nhơl. Tàm broă lơh, Tỉnh đoàn càr Gia Lai neh lam lơh kĭ Sră cih kah lơh broă bal tơngai bơh nam 2026 tus nam 2030 mờ Tỉnh đoàn ală càr Sekong, Salavan mờ Attapue, lơgar Lào nàng kờñ lơh jat ngan ngồn ală jơnau hơ pơrgon bơtàu tơnguh.