Tàm dơ̆ tìp mat, ồng Tô Lâm, Tổng Bí thư, Chủ tịch lơgar neh đơs tus 4 bơta tờm, hơ̆ là: Pal git wă di bè jơnau gơtha bơh rơndap lài bơto bơtê mờ kơnòl kwang bàng dê tàm rơndap lài bơto bơtê; Pal tơl pràn jak ngan ngồn bơh mpồl kwang bàng gơ wèt Mpồl Đơng lam Đảng atbồ tàm tŭ tơngai pa dê. Bơta kờp geh dut ndơl pal là phan lơh gơs, cồng nha lơh geh, bơta gơ rềng, bơngă pin dờn mờ khà drơng broă làng bol in; Pal tam gơl pa broă atbồ, pơlam tàp mờ ngui kwang bàng tơnơ̆ rơndap lài bơto bơtê. Ồng tơngkah uă ngan tus broă lơh gơlik anih nàng kwang bàng khin sơnơng, khin lơh, khin kong kơnòl.

Ồng Tô Lâm, Tổng Bí thư, Chủ tịch lơgar đơs loh, broă rơcang mpồl kwang bàng tŭ do là rơcang pràn jak đơng lam Đảng dê ai ală gơl gùng bơtàu tơnguh pa in. Rơndap lài bơto bơtê là tŭ tơngai rơcang, pơlam tàp, sền swì ngan ngồn mờ sac rơ wah; ờ di là rơcang “cơ gĕ” ai kwang bàng đơng lam in. Tổng Bí thư, Chủ tịch lơgar đơs sùm: gơnoar broă là bơta sồr bơh mpồl lơh broă dê, gơnăp gơnoar là bơta jàu wơl nàng drơng broă dà lơgar mờ làng bol in; nùs nhơm, bơngă pin dờn mờ tềl lời wơl tă pơgồp bơh tơl nă cau dê bơt bơtàu geh. Nùs nhơm mờ pràn jak kwang bàng dê pal geh sền swì tàm ngan ngồn, mờ broă ngui gơnăp gơnoar, mờ cồng nha lơh broă bal mờ bơta pin dờn kwang bàng, đảng viên mờ làng bol dê.