Tus bal dơ̆ bơyai lơh, ồng Lê Minh Hưng, Thu tướng Chính phủ jơh nùs ki ngàm mờ kah rơngal ală cau neh geh 80, 75 mờ 70 nam ơm tàm Mpồl cau geh Đảng. Thủ tướng đơs nền, do ờ mìng là ală tềl bè tŭ tơngai, mờ là gùng jòng bơh bơta pơlam tàp, tă pơgồp mờ bơta jơh nùs dòn song mờ Đảng, mờ Dà lơgar tờm, mờ Làng bol. Thủ tướng đơs là, Sơn tờm dà lơgar ngai 02/9 là ngai chờ dờng ngan jơi bơtiàn dê; do là dơ̆ nàng bal mờ gơp pơn yờ să sền wơl gơl gùng 81 nam lơngăp lơngai is, khat gơboh, tơrgùm dùl, bơt bơtàu, bơtàu tơnguh dà lơgar mờ cồng nha dờng màng bơh broă lơh kac màng rlau 96 nam tềng đap bơta đơng lam Đảng dê.

Tàm gùng hơ̆ neh lời wơl tềl ală bơta phi să, ală bơta tă pơgồp bơh uă rơnàng cau Việt Nam dê, is ồn là ală đảng viên jŏ sơnam - ală cau neh gờñ git wă di ngan gùng dà, bồ tơngoh Đảng dê, lòt jat Đảng bơh ală nam nhai dà lơgar gam li la bơta kal ke, bòl glar. Thủ tướng kơp kờñ ală Đảng viên mờ mờng chài, bồ tơngoh jak mờ bơngă pin dờn he dê, pơn jat tai sền gròi, tă pơgồp jơnau đơs bơt bơtàu Đảng, bơt bơtàu gơnoar atbồ; bơto bơtê, pơn jờng kòn sau; bơto wơl rơnàng kơnòm să in nùs nhơm gơboh dà lơgar, nùs nhơm brồ guh is, pơn đơl pràn is, nùs nhơm geh kơnòl mờ mpồl bơtiàn mờ bơta kơp kờñ bơt bơtàu ƀòn tờm, dà lơgar pas pràn.