Ală nam do, bơh bơta đơng lam bơh Đảng dê, bơta ătbồ bơh Dà lơgar dê mờ bơta tơrgùm bal pràn bơh jơh gùt mpồl bơtiàn dê, broă lơh sền gàr rài kis neh lơh geh uă cồng nha kwơmàng, tus tŭ do jơh gùt lơgar geh rlau 99 tơlak nă cau geh sră kham sơm kòp ờ sa priă; pơgăp 2 tơlak 500 rbô nă cau geh dờp bơta dong kờl priă pah nhai cau dờng sơnam in, rề ơnàng sền gàr gơ wèt mờ cau dờng sơnam ờ priă nhai jơh sơnam lơh broă. Gùng dà broă lơh tơrmù rƀah, càn priă, hìu ơm, bơto bơtê, lơh sơnơm, broă lơh mờ dong kờl trồ tiah lơh aniai neh gơgơs anih kơldìng bơh gĭt nđờ tơlăk hìu bơnhă dê.

Ồng Tô Lâm, Tổng Bí thư, Chủ tịch lơgar đơs là, broă lơh sền gàr rài kis mpồl bơtiàn neh lơh geh uă cồng nha kwơmàng. Bulah bè hơ̆, trồ tiah lơh aniai, kòp bơtờp, măy mŏk lơh is mờ tam gơl bơh drà lơh broă dê kung gam lơh gơlik ală bơta gơ aniai pa. Kờñ làng bol geh sền gàr tềng đăp ală rềs àr gơ aniai, Dà lơgar pal geh gùng dà broă lơh di, ală anih lơh broă pal geh pràn jak yal lài, drơng wơl mờ dong kờl di tŭ. Tổng Bí thư, Chủ tịch lơgar sồr pal geh ală sơnio khà dà lơgar bè sền gàr rài kis mpồl bơtiàn, yal pah nam jăt ƀòn lơgar mờ mpồl làng bol ơm kis. Jơnau kờñ tus nam 2030 là lơh gơs bơh sơnrờp ală anih lơh broă sền gàr rài kis mpồl bơtiàn uă cờn, glòm jơh, lơh sồ, gàr niam sền gàr rài kis mpồl bơtiàn bơh êt ngan rlau jơh ai tơl nă làng bol in. Tổng Bí thư, Chủ tịch lơgar sồr Chính phủ, Quốc hội, Mặt trận Dà lơgar Việt Nam, kâp ủy, gơnoar ătbồ ƀòn lơgar mờ jơh gùt mpồl bơtiàn tơrgùm tê bal, pơnđơl nàng tơl nă làng bol Việt Nam, bulah ơm tàm tiah lơi mờ tàm bơta lơi, ndrờm geh sền gàr tềng đăp ală rềs àr gơ aniai uă, geh dờp ală drơng broă kờñ pal geh mờ geh tŭ niam bơtàu tơngguh.