Ồng Tô Lâm, Tổng Bí thư, Chủ tịch lơgar đơs, tơnơ̆ dùl nam lơh jăt Jơnau lơh nền tàm pơrjum sồ 71, tam gơl loh làng ngan là bè jơnau git, kơrnoăt pal jăt, broă lơh, bơta pràn mờ gùng dà atbồ broă lơh; uă bơta gơkòl jŏ nam neh rơhời geh bơsong.

Broă dong kờl gơwèt mờ cau pơgru, cau bơsram geh sền gròi rơlao; bơto bơtê broă lơh mờ bơto bơtê đại học geh tam gơl jăt gùng dà broă lơh pơgồp bal mờ bơta chài, măi mok, tam gơl pa bơceh lơh mờ jơnau kờñ cau lơh broă. Mơya, ồng Tô Lâm, Tổng Bí thư, Chủ tịch lơgar đơs là ală tam gơl bè bơta niam broă bơto bơtê, mpồl cau pơgru, cau bơsram mờ cau lơh broă ờ hềt mùl màl loh làng. Tàm tơngai tus pal tam gơl pràn bơh broă lơh gơs kơrnoăt pal jăt, broă dong kờl tus mờ broă bơyai lơh, ai geh cồng nha mùl màl. Gah Bơto bơtê mờ bơsram pal tam gơl pa mùl màl bơh broă atbồ hìu bơsram, mpồl cau pơgru tus mờ gùng dà broă bơto, bơsram, pơrlòng mờ sền sơwì; tơrmù bơsram nàng rơcang lài, tơnguh broă bơsram is, lơh is, bồ tơngoh krơi is mờ bơta pràn bơsong broă.